• 6-декабрда Жогорку Кеңеште жаңы депутат ЗАКИР ШАРАПОВ ант берди. Ал жакында көз жумган «Республика-Ата Журт» фракциясынан депутат Улан Чолпонбаевдин ордуна мандат алган.
• Көк бөрү оюну ЮНЕСКОНУН материалдык эмес маданий мурастарынын тизмесине Кыргыз өлкөсүнүн атынан катталды.
• Орусиянын президенти ВЛАДИМИР ПУТИН Орусияда 2018-жылы өтүүчү президенттик шайлоого катышарын билдирди. Ал буга чейин 3 ирет президент болуп шайланган.
• Кыргыз мамлекетинин жогорку окуу жайларында билим алууга келген ЧЕТ ӨЛКӨЛҮК СТУДЕНТТЕРДИН көбү индиялыктар жана казакстандыктар. Эң азы Европа өлкөлөрүнөн келгендер.
• Түрк маданиятынын эл аралык уюму ("Түрксой") 2018-жылды «АЙТМАТОВ ЖЫЛЫ» деп жарыялады. Эске салсак, 2018-жылы Кыргыз жазуучусу Чыңгыз Айтматовдун 90 жылдыгы белгиленет.
• БАЛЫКЧЫ шаарынын экс-мэри Сатыбек Шамшудиновду сөккөн Балыкчынын азыркы мэри Алмазбек Мамбетов соттун чечими менен 2 миң сом айыпка жыгылды.
• ОШ ОБЛУСУНДА ден соолугунун мүмкүнчүлүгү чектелген 6818 адам жашайт.
• Учурда Кыргыз өлкөсүндө 17 КАМСЫЗДАНДЫРУУЧУ уюм иш алып барууда. Алардын саны 2012-жылдан бери 2 эсе өскөн.
• Кыргыз жарандары Сербия өлкөсүндө 90 күнгө чейин ВИЗАСЫЗ жүрсө болот. Аталган келишимге тышкы иштер министри Эрлан Абдылдаевдин Сербияга иш сапары алкагында кол коюлду.
• Жаш активисттер өспүрүмдөргө терс таасир берет деген жүйө менен Кыргыз өлкөсүндө ПОРНОГРАФИЯЛЫК сайттарга тыюу салууну сунушташууда.
• Республика аймагында 87 өзгөчө КОРУККА АЛЫНГАН АЙМАК бар. Алар өлкө аймагынын 1 миллион 476 миң гектар аянтын түзөт же болбосо 7,38 пайызын ээлейт.

Бектур Токтоноев
politika@super.kg