Жан дүйнөдө жаңылануу талап кылып, көп нерседен үмүттөндүргөн Жаңы жылдын кирип келишине саналуу күндөр калды. Ит жылы Жаачы, Текечер, Суу куяр, Балык жылдыз белгиси астында төрөлгөндөргө эмне убада кылат, эмнеден сактанууну эскертет? Астролог Жанар Кадыралиевдин астротөлгөсүнө көңүл буралы.

ЖААЧЫ (23.11-21.12)

ЖААЧЫ-ЧЫЧКАН
Белди бекем бууңуз. Жылдын биринчи жарымында амбицияңызга мүмкүнчүлүк менен шарттарыңыз дал келбей калышы мүмкүн. Июнь-июль айларында акча тартыштыгы жаралат. Сентябрда жаңы бизнес баштоого сунуш түшөт. Качпаңыз, материалдык абалыңызды жакшыртып жакындарыңызды кубантууга жетишесиз. Жыл бою энергетикалык потенциалыңыз жогору болгондуктан жылдыздар сизге сергек жашоону тандоону сунушташат.



ЖААЧЫ-УЙ
Сиз үчүн Ит жылы кирешелүү болот. Ал үчүн каалооңузду бир аз күчтөнтүп, жөндөмдүүлүгүңүздү туура пайдалана билиңиз. Жыл ортосунда жаңы таанышуулар орун алып, чөнтөгүңүздүн кампайышына же карьералык тепкичте жогорулашыңызга алардын жардамы тиет. Жеке жашооңузда жакын адамдарыңыздын мүдөөлөрүн угуп, аларды аткарганга аракет кылыңыз. Күз айларында узак жолдо жүрүүдө абайлаңыз, кырсык тоорушу мүмкүн.


ЖААЧЫ-ЖОЛБОРС
«Саргара жортсоңуз, кызара бөртөсүз» демекчи, бул жылдагы ийгиликтердин баары сиздин аракетиңизге жараша болот. Буга чейин жасалбаган жумуштардын бир тобун бүтүрүп жеңилдейсиз. Бирөөнүн оюн уга билиңиз. Болбосо өзүмчүлдүгүңүз көп таарынычтардын жаралышына себепчи болот дешет жылдыздар. Жайкысын оңдоп-түзөө иштерин жүргүзүүдө эрежелерди туура, так сактабасаңыз, жаракат алуу коркунучу бар.



ЖААЧЫ-КОЁН
«Көз коркок, кол баатыр» деген ураанды туу тутуп, алдыга кадам таштаңыз. Сизди ар тараптан мүмкүнчүлүктөр күтүп турат, колдон чыгарбаңыз. Август айында алыска сапарга чыгуу күтүлүүдө, чемоданыңызды даярдоону унутпаңыз. Күз айларында үй-бүлөдө толуктоолор орун алып, той өткөрөсүз. Жыл аягында жашырылган сыр ачыкка чыгып, туугандар арасында чыр орун алышы мүмкүн. Мындан улам ден соолугуңуз начарлайт.


ЖААЧЫ-БАЛЫК
Жыл сизден күжүрмөндүүлүктү талап кылат. Буга чейин ишке ашырсам деп жүргөн максатыңызга баш-отуңуз менен киришип, кирешеге ээ болбосоңуз да, кийинки жылга пайдубал түптөгөнгө жетишесиз. Күзүндө кошумча курста окуп, жаңы адистик алууга белсенесиз. Жылдыздар сүйүктүүңүздөн, үйдөгүлөрдөн көп нерсени талап кылбоону эскертишет.


ЖААЧЫ-ЖЫЛАН
Жыл башында достордун катарын иргеп, өзүңүзгө кымбат адамдар менен мамилелерди жакшыртасыз. Жаз айларында ден соолугуңузга байланыштуу көйгөйлөр чыгып, саламаттыгыңызды чыңдоого туура келет. Жүрүш-турушуңуз боюнча орундуу да, орунсуз да сындар айтылат. «Жети өлчөп, бир кесип» чечим чыгарбасаңыз, үй-бүлөңүзгө кедергиси тийиши ыктымал.


ЖААЧЫ-ЖЫЛКЫ
Сизди берекелүү жыл күтүп турат. Жеке менчикке ээ болуп, маңдайыңыз жарыла кубанасыз. Бирок бир аз карыздар болосуз. Санааркабаңыз, жакындарыңыздын жардамы менен андан бат эле кутуласыз. Август айында үй-бүлөлүк керектөөлөрдөн улам чыгашаңыз бир топко өсөт. Болор-болбос нерселер үчүн уруш чыгарбасаңыз эле жеке жашооңуз тынч болот.


ЖААЧЫ-КОЙ
Чоң таарынычтын каалгасын ачпайын десеңиз, бирөөлөргө сын айтуудан алыс болуңуз. Каржылык жаатта ийгилик күтүлөт. Жеке жашоодо олуттуу чечимдерди кабыл алууга туура келет. Өзүңүздөн акча аябайсыз. Келбетиңизге көп көңүл бурасыз, сулуулук салонуна, спорт залга, бассейнге барып, өзүңүзгө ырахат тартуулайсыз.


ЖААЧЫ-МАЙМЫЛ
Каржы маселесинде жыл бою туруктуулук сакталат. Жаңырган жылдын биринчи жарымында ден соолукту чыңдоого жетишесиз, үй-бүлөлүүлөр өздөрүнө эсте каларлык эс алуу тартуулашат. Көптөн бери балалуу болууну самагандар ушул жылга пландашса, орундалат. Октябрда акча тартыштыгы жаралып, көп нерселерден баш тартууга туура келет.


ЖААЧЫ-ТООК
Жекече иш баштоого кадам таштайсыз. Башталышы сизге кыйынчылык жаратканы менен, жыйынтыгы сизге кубаныч тартуулайт. Кенебестигиңиздин айынан документ иштеринде маселелер жаралып, чыгым тартасыз. Октябрь-ноябрь айларында атаандаштарыңыздын жайган торуна түшүп калуудан сактаныңыз.


ЖААЧЫ-ИТ
Жыл башында анча-мынча көйгөйлөр жаралат. Аны айланаңыздагы таасирдүү адам аркылуу чечүүгө жетишесиз. Жазында карьераңызда чукул бурулуштар күтүлүүдө, алар сизге жакшы багыт берет. Август айында кирешеңиз көбөйөт. Жашыруун роман түзүүдөн абайлаңыз, чоң чырдын жаралышына себепчи болот.


ЖААЧЫ-ДОҢУЗ
Жылды кандай баштасаңыз, ошондой бүтөт. Бир орунда отура бербей аракет кылыңыз. Болушунча ачык болуңуз. Анткени ачыктык, адамдар менен тил табыша билүү сизди ийгиликке жетелейт. Бул жыл сиз үчүн достуктун жана кызматташтыктын жылы болот. Жашоого болгон көз карашыңызды өзгөртө турган адамга жолугушуңуз ыктымал.

ТЕКЕЧЕР (22.12-20.01)

ТЕКЕЧЕР-ЧЫЧКАН
Жумуш сизден өжөрлүктү талап кылат. Канчалык көп иштесеңиз, ошончо каражат табасыз. Жалкоолукту жеңе албасаңыз, акчасыз калышыңыз толук ыктымал. Эски достор, эски тааныштар аркылуу ийгиликтерге жетишесиз. Мамилелер жанданып, мурда баштаган ишиңизди кайра колго алууга жетишесиз. Атаандаштар менен тил табышасыз. Түгөйүңүз менен мамилени бекемдөө август айына белгиленген.



ТЕКЕЧЕР-УЙ
Кенебестигиңиздин айынан көп көйгөйлөр жаралып, көп иштерден кол жууйсуз. Тапкан кирешеңиз орточо болот. Жыл ортосунда өнөкөт ооруңуз козголуп, көп убактыңызды дарылануу, эс алууга арнайсыз. Август айында жашооңузда жагымдуу жаңылык орун алат. Маанилүү, чоң акча жумшалчу иш баштаардан мурун ишенген адамдарыңыздан кеңеш алууну сунушташат жылдыздар.



ТЕКЕЧЕР-ЖОЛБОРС
Канчалык иштесеңиз, ошончолук тиштейсиз. Жакшылап мээнеттенсеңиз чакан кыймылсыз мүлк алууга мүмкүнчүлүк жаралат. Акча табуу максатында бирөөлөрдү алдоодон оолак болуңуз, соттук териштирүүгө чейин жетиши ыктымал. Дайынсыз кеткен тууганыңыз же досуңуздун табылары күтүлүүдө.


ТЕКЕЧЕР-КОЁН
Идеяларды, долбоорлорду ишке ашыруучу жыл. Тиешелүү адамдарга сунуштоодон тартынбаңыз. Биринен болбосо биринен колдоо таап кубанасыз. Апрель таанышууларга бай ай, айрым бойдоктор түгөйүн табышат. Күзүндө каржыга байланыштуу маселе жаралып, насыя аласыз. Ноябрда ууру-кескилерден абайлаңыз, буюм уурдатып, жоготуп алуу коркунучу жаралууда.


ТЕКЕЧЕР-БАЛЫК
Купуя аракет этүүнүн аркасында көп нерсеге жетишесиз. Күтүүсүз келген акчага марыйсыз. Көпчүлүк үй-бүлөлөрдө ата-энеси менен пикир келишпестик жаралат. Жаңы бирөөлөр менен мамиле түзүп, андан ырахат алууга жетишесиз. Бирок бул мамиле көпкө созулбашын эске түйүңүз. Күзүндө өнөкөт ооруңуз козголушу мүмкүн.


ТЕКЕЧЕР-ЖЫЛАН
Тапканыңызды сарамжал пайдаланып, турак жай же жер тилкесин алууга каражат топтойсуз. Соода тармагында иштегендер чоң кирешени август айында күтүшсө болот. Чет өлкөдө эс алып келүү максатыңыз жай айларында ишке ашат. Келбетине пластикалык операция жасатууну каалагандар август айына пландашса жыйынтыгы кубандырат.


ТЕКЕЧЕР-ЖЫЛКЫ
Жыл башында жумуштан кетүү чечимин кабыл аласыз. Жакындарыңызга жетиштүү көңүл бөлбөгөнүңүздөн же дагы башка себептерден улам үй-бүлөдө жылдын биринчи жарымында айрым бир маселелер жаралат. Жыл бою өзүңүздү жакшы эле сезесиз, бирок жылдыздар сизди туура тамактанууга, сергек жашоого чакырат.



ТЕКЕЧЕР-КОЙ
2018-жыл максаттарыңызды орундатуучу мезгил. Жаңы жумуш орду сунушталат. Сунуштарды четке какпаңыз, кадырлуу тааныштарды күтүп, кадыр-баркыңыз көтөрүлүп, акчаңыз көбөйөт. Манчыркап кетүүдөн сак болуңуз, бакыт кушу бат эле учуп кетиши ыктымал. Күз айларында жеке жашооңузда маселелер орун алышы күтүлүүдө. Тилиңизди тартсаңыз, чоң балээнин алдын алган болосуз.



ТЕКЕЧЕР-МАЙМЫЛ
Кирешелүү жумушка орношуу, чет элге командировкага чыгып келүүгө мүмкүнчүлүк жаралат, баш тартпаңыз, жаңы идеялар жаралат. Эски жана жаңы достордун ал-абалын сурап турууну унутпаңыз, таарынычтар орун алат. Май айында сыр чечишүүчү адамга жолугасыз. Күз айларында түгөйлөрдүн мамилеси чырт үзүлүп кетчү абалга жетет. Улуулардын кеңешине таяныңыз.



ТЕКЕЧЕР-ТООК
Жылдыздар мурда баштаган ишиңизди улантууну сунушташат. Ишиңиз жетекчилик тарабынан колдоого алынып, сиз күтпөгөндөй өнүгөт. Жай айларында эски достор, көп жылдан бери көрүшө элек туугандар менен алака жакшырат. Күз айларында эски карыздар же кредит боюнча маселе орун алышы мүмкүн. Алдын алууну кааласаңыз, чыгымдарды ийне-жибине чейин эсептеп, керексиз буюм алуудан качыңыз.



ТЕКЕЧЕР-ИТ
Жыл башында жетекчиликтин, кесиптештердин колдоосуна ээ болосуз. Акча жаатындагы документтерди толтурууда сак болуңуз, октябрь-ноябрь айларында чоң чыр орун алышы ыктымал. Айрымдардын жашоосунда бурулуштар орун алып, чет өлкөгө чыгууга же иштеп келүүгө жол ачылат. Күз өзү менен киреше алып келет. Аны пайдалуу ишке салсаңыз, көбөйөт дешет жылдыздар.



ТЕКЕЧЕР-ДОҢУЗ
Каржы жааты туруктуу болбойт, капчыгыңыз бирде кампайса, бирде бөксөрүп турат. Күз айларында үй-бүлөлүк керектөөлөрдөн улам чыгым тартууга туура келет. Жай мезгилинде буга чейин катташпаган туугандар менен алака күч алат. Жаздан баштап туура тамактанууга өтүп, өзүңүзгө жетиштүү кам көрсөңүз, көп оорулардын алдын алган болосуз.


СУУ КУЯР (21.01-19.02)


СУУ КУЯР-ЧЫЧКАН
Пессимисттик ойлоруңуздан арылып, оригиналдуу ойлоруңузду ортого салыңыз. Сөзсүз таасирдүү адамдардын колдоосуна алынып, алардын кеп-кеңеши, көмөгү менен жаңы иш баштайсыз. Бирок жыйынтыгы кийинки жылда гана көрүнөт, жылдыздар сабырдуу болууга чакырышат. Бир көргөн адамга жан дүйнөңүздү ачпаңыз, алданып калууңуз мүмкүн.



СУУ КУЯР-УЙ
Перспективдүү мүмкүнчүлүктөр түзүлөт, чечкиндүү болуңуз. Илим же чыгармачылык жаатында алектенген адамдарга ийгилик жылмаят. Жылдыздар май, июнь айларында насыя албоону, төлөөгө келгенде кыйынчылыктар жараларын эскертишет. Кыйын жагдайларда өзүн колго ала билгендердин үй-бүлөсүндө бардыгы жакшы болот. Туура тамактанып, иммунитетти көтөрүп жана спорт менен машыгып оорулардан алыс боло аласыз.



СУУ КУЯР-ЖОЛБОРС
Мурдатан кыялданып жүргөндөр кыялын ишке ашырууга аракеттенсе, ийгиликке жетишет. Үй-бүлөлүү Суу куяр-Жолборстор ата-энесинин кеңешине муктаж болушат. Бойдоктор бир убакта эки адамды сүйүп, тандоого дуушар болушат. Мында бирөөнүн кеңешин эмес, жүрөгүңүздү уксаңыз, жаңылышпайсыз. Күзүндө депрессияга кабылуу коркунучу бар. Андыктан таза абада эс алып, жөө басууну адатка айлантыңыз.



СУУ КУЯР-КОЁН
Жетекчилик менен иш алып барууда сак болуңуз. Жылдыздар шашылыш чечим кабыл албай, терең ойлонууну сунушташат. Август айынын аягында кыймылсыз мүлккө ээ болуп кубанасыз. Жакыныңызга карызга акча берүүдөн абайлаңыз, түшүнбөстүктөр орун алып, эски таарынычтар козголот. Күз айларында жүрөк, жүрөк-кан тамыр ооруларынын алдын алыңыз.



СУУ КУЯР-БАЛЫК
Билимиңизди өркүндөтүүгө ылайыктуу жыл. Максатыңызга жетүү үчүн жасаган кадамдарыңыз текке кетпейт. Болгону Ит жылы сизден ызы-чуудан алыс болуп, токтоо болууну суранат. Мындай кадамыңыз үй-бүлөнү, достор арасында мамилени сактап калууга өбөлгө болот. Июнь-июль айларында ден соолукка олуттуу көңүл бурууну жылдыздар сунушташат.



СУУ КУЯР-ЖЫЛАН
Сизди бардык жаатта ийгилик күтөт. Өзгөчө август айы сизге ийгилик тартуулайт. Түгөйүңүз тараптан мыкты колдоо көрсөтүлөт, ыраазычылык билдирүүнү унутпаңыз. Бойдоктор апрель-май айларында түгөйүн жолуктурушат, аны түбөлүккө айлантуу сиздин мамилеңизден көз каранды. Ден соолугуңузда көп деле кооптонуу жаралбайт. Күзүндө бирөөгө карыз берүүдө абайлаңыз, кайтара албай өкүнөсүз.



СУУ КУЯР-ЖЫЛКЫ
Профессионалдык жактан өнүгүүлөр байкалат. Бирок жеке жашоодогу айрым маселелер тоскоол болот. Өзүңүздү колго алсаңыз, баарын өз жолуна салууга жетишесиз. Үй-бүлөлүүлөр балдарына көбүрөөк көңүл бурушат. Жылдыздар бойдокторду түгөй тандоодо кылдат болууга чакырышат, көңүл калуу коркунучу жогору. Өнөкөт чарчоого кабылып калбоо үчүн көбүрөөк эс алып, тамактанууңузду көзөмөлдөй жүрүңүз.



СУУ КУЯР-КОЙ
Жашооңузда жакшы жакка өзгөрүү, кесип алмаштыруу мүмкүнчүлүгү, жаңы тааныштардын пайда болушу жана жагымдуу саякаттар орун алат. Жаңы бизнес баштайм десеңиз, күч, энергия топтоп май айында киришкениңиз оң. Жазында аллергия жана суук тийүүдөн сактаныңыз. Жылдыздар кайрымдуулук иштерин, жакындарга жардам берүүнү сунушташат. Бойдоктор үйлөнүү тоюн жайдын аягына же күздүн башына белгилешсе никелери бекем болот.



СУУ КУЯР-МАЙМЫЛ
Өткөн жылы чечилбей калган маселелерди чечүүгө ылайыктуу жыл. Тапканыңызды ой-келди чача бербеңиз, кеч күздө акча тартыштыгы жаралышы күтүлүүдө. Апрель айында ачууга алдырып жакыныңызды таарынтып алуу коркунучу жаралууда, өзүңүздү колго алууну үйрөнүңүз. Кеч күздө ушак жаратып үй-бүлөңүздү бузган адам пайда болот, кулагыңызга эмес, көзүңүзгө ишеним артыңыз.



СУУ КУЯР-ТООК
Жыл ичинде ички туюмуңузга көп таяныңыз, жагымдуу күндөргө, эсте каларлык окуяларга күбө болосуз. Жай айларында турак жайыңызды ойдогудай өзгөртүүгө жетишесиз. Күз – сиздин үй-бүлө үчүн тойлордун мезгили. Андыктан жыл башынан тарта тапканыңызды үнөмдүү пайдалана билиңиз. Болбосо жыл аягында карыздар болуп калышыңыз мүмкүн. Ден соолук жаатында олуттуу көйгөй жаралбайт.



СУУ КУЯР-ИТ
Инициатива көтөрүп, жоопкерчиликти өзүңүзгө алсаңыз, көп ийгиликтерге жетишесиз. Жай айларында акча тартыштыгы жаралат, бирок ири суммага ээ болуу да күтүлүүдө. Туура сарптаганга аракет кылыңыз, убактылуу достордун пайда болушу күтүлүүдө. Кыймылсыз мүлк сатып алууда үй-бүлөдө түшүнбөстүктөр орун алышы ыктымал. Ноябрь айы ден соолугуңуз үчүн кооптуу ай. Жолдо жүрүүдө сак болуңуз.



СУУ КУЯР-ДОҢУЗ
Өз позицияңызда турсаңыз, бул жылы максаттарыңыздын 90 пайызын аткарууга жетишесиз. Февраль, март, май, июль, август сиз үчүн кирешелүү айлар. Октябрь айынын аягында атаандаштардын бут тосуусунан сактаныңыз. Үй-бүлөдө эмоцияга алдыруудан, жакыныңыздын көңүлүн оорутуп алуудан абайлаңыз. Анын кесепетинен баш ооруга, кан басымдын көтөрүлүшүнө чалдыгасыз.


БАЛЫК (20.02-20.03)


БАЛЫК-ЧЫЧКАН
Жашоо шартыңызды жакшыртуучу өзгөрүүлөргө даярдана бериңиз. Материалдык абалыңыз жакшырып, жагымдуу нерсе менен айкалыштыра аласыз. Мисалы, чет өлкөдө эс алуу, жер кыдырып саякаттоо. Адамдарды тааныштыруудан оолак болуңуз, жаманатты көрүнүп калуу коркунучу бар. Жеке жашооңуз, ден соолугуңуз бир калыпта болот.



БАЛЫК-УЙ
Өзүңүздү баалооңуз жакшырып, келбетиңизге пластикалык операцияларды жасатууга, имиджиңизди өзгөртүүгө белсенесиз. Жаңы иш баштоодо чыдамкай болсоңуз, ийгилик сиз тарапта болот. Жай айларында ашказан, ичеги ооруларынын алдын алыңыз.



БАЛЫК-ЖОЛБОРС
Мурун баштаган ишиңиздин үзүрүн көрчү мезгил келди. Киреше үзгүлтүксүз болуп, акча тартыштыгы жаралбайт. Үй-бүлөңүз көп көңүл бурууну талап кылат, чогуу эс алууга убакыт бөлөсүздөр. Сыртта жүргөн туугандар менен мамиле түзүлүп, жаңы идеялардын ишке ашуусуна өбөлгө болот. Бойдоктор кыска мөөнөттүү роман түзүүгө жетишет.


БАЛЫК-КОЁН
Карьера жасоодо жана финансы жаатында ийгиликтүү болмокчу. Ата-энеңиздин колдоосуна, кеп-кеңешине муктаж болосуз. Кыймылсыз мүлк сатып алып же үйүңүздү кеңейтип кубанасыз. Мурун сиз кол сунган адамдардан колдоо аласыз. Күз айларында электр буюмдарын оңдоодо сак болуңуз, жаракатка кабылуу коркунучу жогору.



БАЛЫК-БАЛЫК
Өнөктөштөр менен мамиле түзүүгө август, сентябрь ийгиликтүү. Бул айларда кирешеңиз да көбөйөт. Ноябрда бирөө тууралуу ушак айтуудан оолак болуңуз, чоң чырдын башталышына себеп болушу ыктымал. Үй-бүлөдө ачык болуңуз, мамилелер бекемделет дешет жылдыздар.



БАЛЫК-ЖЫЛАН
Июль-август айлары тынч эмес, ар кандай маселелер жаралып, тиешелүү адистердин кеңешине муктаждык жаралат. Ишкерлер атаандаштарынын бут тосуусуна кабылышат. Үй сатып алууда, жер тилкесин же ири жеке менчикке ээ болууда маселелер орун алат. Андыктан документ иштеринде, майда-барат нерселерге кылдат жана так болуңуз.



БАЛЫК-ЖЫЛКЫ
Жыл башында жеке жашооңузда маселелер жаралып, август айында оң тарапка чечилет. Сабырдуу болуңуз, болбосо экинчи маселени башыңызга үйүп алуу күтүп турат. Күздүн башталышында жакындарыңыз менен жакшылыгыңызды белгилейсиз. Декабрь айы күжүрмөндүктү талап кылган кирешелүү ай.



БАЛЫК-КОЙ
Кыялдагы жумушту баштайсыз. Башында «эмнеге баштадым?» деп өкүнгөнүңүз менен, ноябрь-декабрда алгачкы ийгилигин көрүп кубанасыз. Башка шаардагы тааныштарыңыз менен мамилеңиз жакшырат. Июнь-июль айларында мамиле түзүүдө сак болуңуз, алданып калуу коркунучу чоң. Ден соолук жаатында көйгөйлөр жаралбашы үчүн өзүңүздү сергек алып жүрүүгө аракеттениңиз.



БАЛЫК-МАЙМЫЛ
Кирешелүү жыл. Жыл башынан эле иш үстүнө иш кошулуп отуруп чарчаганыңызды күз айларында гана сезесиз. Жылдыздар ден соолугуңузга өзгөчө кам көрүп, дарыгердин көзөмөлүнөн өтүүнү сунушташат. Жайында бир топ маселелер жаралат. Ойлонуп чечим кабыл албасаңыз, жагымсыздыкка кабыласыз.



БАЛЫК-ТООК
Жыл башындагы жумуш ордун алмаштыруу үчүн жасаган жашыруун аракетиңиз ишке ашпайт. Жаңы жумуш орду көңүлүңүзгө туура келбей, артка кайтууга туура келет. Тапкан кирешеңиз күнүмдүк жашооңузга жетет. Көп наалыбаңыз, нерв системине байланышкан ооруларды чакырышы мүмкүн. Август айында өзгөчө белек алып кубанасыз. Жыл аягында үй-бүлөңүздө толуктоолор күтүлөт.



БАЛЫК-ИТ
Реалдуу ишке аша турган пландарга гана киришпесеңиз, убактыңыз, энергияңыз текке кетет. Карьеранын артынан сая түшкөндөр сүйлөшкөн адамынан кол жууп калуулары ыктымал. Андыктан түгөйүңүзгө, үй-бүлөгө, балдарга көңүл бурууга да аракеттениңиз. Бул жылы киреше орточо болгондуктан үнөмдүү болууңуз кажет. Үй-бүлөлүүлөрдүн жашоосу бир калыпта тынч өтсө, бойдоктор бирөөлөрдүн көңүл буруусуна муктаж болушат.



БАЛЫК-ДОҢУЗ
Ит жылында жалгыз иштөө сизге ийгилик алып келбейт. Топ менен иштеп, эски досторуңуздун кеңешин уга билиңиз. Маданият жана илим, билим тармагында эмгектенгендерде карьералык өнүгүү байкалат. Каржы жааты туруктуу болот, үзгүлтүккө учурабайт. Август-сентябрь айларында айрым бойдоктор бойдокчулук менен коштошушат. Ден соолукта олуттуу маселелер жаралбайт, айрымдар диета сактоого өтүшөт.

Дамира Арстанова
kenesh@super.kg