Интернеттеги билдирүүлөргө таянып тыянак чыгарууга болбосун ар бир окурманыбыз жакшы түшүнөрү анык. Ырчы айым бул талкуулар тууралуу эмне дейт, өз оозунан угалы.

«ЖОМОКЧУЛАР ЖОМОГУН АЙТА БЕРИШСИН»
-Бул бирөөнүн буюртмасы экени даана көрүнүп турат. Мындан 5 жыл мурун «Кыргызпатентте» гонорар тапшыруу учурунда, расмий иш-чарада тартылган сүрөттү пайдаланып жатышат. Менден башка толтура ырчыларда да дал ушундай сүрөттөр бар. Жомокчулар жомогун айта беришсин. Мен башкаларды бактылуу кылууга аракет көрүп жүрөм. Дубайга «Бактылуу айым» долбоору боюнча барабыз» деп ноябрда пландап билет, жолдомо алынган. Дубайга жолдошум келген жок, кыздарым Айыма, Элиманын, апамдын, инилеримдин чыгымын өзүм каржыладым. Өнөктөш демөөрчүлөр кимдер экенин биздин жамаат билет. Бул иштерге Марат Назарбековдун тиешеси жок. Маратты Урмат экөөбүз тең көп жылдан бери тааныйбыз. Мага жеткен маалымат боюнча, ал жубайы менен бир нече жыл мурун ажырашыптыр. Буга чейин Айжан Мараттын үй-бүлөсүнө да ызы-чуу салып мүлк талашканын айтышты. Марат үй-бүлөсүнүн ызы-чуусунан тажап чет жакта жашап жүргөн дешет. Кийин кайра чогуу жашап, бир жыл мурун Айжан Мараттын ата-энесинин үйүн алам деп чыкканда ага өзү каалаган үйүн алып берип өз эркине коюшкан экен.

«МАРАТ АЛЫП БЕРГЕН ЭМЕС, ИЖАРАГА АЛГАН ҮЙДӨ ЖАШАЙМ»
-«Vefa» соода борбору менен кызматташууну баштаарда Мараттын кабинетине Урмат менен киргем. Сүйлөшүп, андан тышкары концерт иш-чараларын уюштуруп, жардамдашканбыз.
Баян Максат кызынын Бишкекке келишин, китебинин бет ачарын өткөрүүдө анын жол кире жана башка чыгымдарын жабыш үчүн мен «Vefa» соода борборуна кызматташууну сунуштагам. Бишкекте конокту алып жүрүү үчүн жакшы коштоочу унаалар керек болгондуктан, аталган соода түйүндүн башкаруучу директору Эмил аттуу мырза менен сүйлөшкөм. Алар менин коногумдун келгендеги чыгымын көтөрүштү. Мен аларга бекер концерт уюштуруп, Инстаграмдан жарнама кылып бергем.
Балиде эс алганым тууралуу айтсам, Айжан менин Балиге кайсы убакта барганымды билет бекен? Ал анын мени айыптап эл алдына акмак кылам деген коркутуу сөздөрүн текшерүү максатында жасалган иш болчу.
Урмат экөөбүздү "Марат сатып берген үйдө жашайт" дептир. Биздин үй сатыкка бир жыл мурун коюлган. Анткени өзүбүз үй куруп жатканбыз. Ал үйүбүз толук курулуп бүтө электе жашап жаткан үйүбүз сатылып кеткендиктен жакшы райондон чоң, кымбат батирди жарым жылга ижарага алып жашап жатабыз. Документтери бар. Бул анын жомогу. Айжан мага «Сен жөнүндө ушактар толтура, эл мага ишенет. Аялы катары мен сени «бомбалайм». Андан көрө менин каалап жатканымды андан алып бер, иш ошону менен бүтөт» деген сыяктуу кептерди жазды. Бир сөз айткан жокмун. Анткени аны менен жазышсам көчүрүп алып, бурмалап кайра интернетке чыгармак.
Ал аял учурдагы ызы-чууну пландап жасаган. Мына, азыр ошол аккаунтту таап көргүлө, Айжандын баракчасы жоголуп кетти. Канакей кечээки айыптоолор? «Күйөөм менен жүрөт, антет, минтет» деген сөздөр кана? Ал өзүнө керектүүнү мени пайдалануу менен алды да, жоголуп кетти окшойт.

«УРМАТ ӨЗҮНҮН КЫЗЫКЧЫЛЫГЫ МЕНЕН ЖАШАП КАЛДЫ»
-Ажырашууга арыз жазганым боюнча айтсам, июнда мени Мухтар Өмүракуновго жабыштырып жазылган макала, сүрөттөр чыкканда Урмат чындыкты билип туруп, сиздерге интервью бербей койгон. Менде кандай гана сыноолор болду?.. «Мен ырчы Айармын, апам экөөбүз жол кырсыгына кабылдык. Апам жандандыруу бөлүмүндө жатат» деп бирөө чалып калды. Мен бардык нерсени унутуп, ооруканага чуркап, жардам бермекчи болдум. Алар мени шылдыңдап, ар кайсы жакка чуркатышты. «Эмне эле кылып жатасыңар?» десем, «бардыгын буйрук менен кылдык. «Анжеликаны алаксыткыла, көргүлө кандай адам экенин» дешкен. Биз сизди көрдүк. Чын дилиңиз менен жардам бердиңиз, жакшы адам экенсиз. Биз сизге Мухтар байкенин сүрөттөрүн кайсы сайттарга алып барып бергенибизди айталы дегенбиз. Сайттарга, социалдык тармактарга фейк аккаунттарды ачып, кагазга жазылган тексттерди да жазабыз» деп айтышкан. Менде алар менен болгон сүйлөшүүнүн аудиосу бар. Буйрук берүүчү катары бир айымдын аты аталган. Мен ага ишенгим келген жок. «Кудай өзүмдү, үй-бүлөмдү сактасын» деп жөн койгом. Бирок Урматка «милиция кызматкерлерине кайрылалы, балдарды кармасын» деп канча сурансам дагы унчукпай койду. Ошондон менин таарынып жүргөнүм бар.
Бул жашоодо өзүм жалгыз калгансып жаман болдум. Чындыгында, бирөөнүн колдоосу керек да. Ажырашууга арызды бир ай мурун бергем. Ажырашып деле кете элекпиз. Өтө чоң таарыныч менен, үй-бүлөлүк дагы маселелер бар, аны жакындарыбыз, атам деле, Урмат өзү да билет, ошонун негизинде арыз жазгам. Урмат өзүнүн кызыкчылыгы менен күнү-түнү оюн-зооктон чыкпай жашап калган. Акыркы 2-3 жылда болгон жүк жалгыз менин башыма түшүп калды. Өз-өзүбүзчө жашап, үч кызыбызды багып, бутуна тургузалы деген үй-бүлөлүк чечим болгон. Мен жолдошумду жамандап жар салгым келбейт. Чындыгында, бардык колдоону жолдошум көрсөттү. Элдин баары «күйөөң бай, күйөөңдүн байлыгына көөп жүрөсүң» дешет. Бирок андай эмес, күнү-түнү чогуу аракет кылып иштедик.
Өзүңөр байкасаңар керек, 12-июнда өткөргөн туулган күнүмдө жакшынакай сүрөткө түшүп, силерге интервью берели десем, Урмат көңүлдөнбөй, туулган күнүмдү өткөрүүгө да аракет кылбай койду. Туулган күнүмдү жалгыз уюштуруп, дасторконумду жайып, конокторумду чакырып, эч нерсени билгизген жокмун. Кайын журтум да келди. Бардык жакка тегиз карап келем. Беш жыл олку-солку болуп ортодогу кыздар үчүн жашап келдик. Урмат чындыкты билип турса дагы мени каралагандарга барып, «кой, антпегиле, бул менин келинчегим» деп мага коргоочу боло алган жок.

«СОТТО ИШИМ ЖАТКАНЫН БИЛИП, МЕНИ КОЛДОНУП КЕТИШТИ»
-Жашырганда эмне? Мен 17 жашымда, эрте турмушка чыккандыгымдын себеби, Айчүрөк эже Мухтар байке менен тааныштырып, машинага жалгыз отургузуп коюп, өзү сыртта турган учурлар болгон. Урмат менен апам чуркап чыгып, «Айчүрөк, бул кылганың эмне?» деп эженин кылгандарын көрүшкөнү да бар. Апам «өз кызыма өзүм ээ боло албай кала элегимде, абийири бар таза кезинде күйөөгө берейин» деп мени турмушка узаткан. Бала төрөп, үч жыл эч жакка чыкпай, үйдө 5-6 кайним бар эле, аларга тамак жасап, аялга тиешелүү иштерди кылып отурдум. Нанга деп 20-50 сом таштап кеткен күндөрү болду. Ошондо иштешим керек экенин түшүндүм. Түндөп иштеген күндөрүм болду. Тиккен көйнөктөрүмдүн үстүнөн шуру бастырып, эртең менен таңкы бештерде турмушка чыгып жаткан кыздарга макияж, маникюр, чач жасалгасын жасайм. Бүгүнкү күнгө чейин кандай машина албайын «күйөөм алып берди» деп келем. Чынында, билбей калдым эмне кылышты. Мен чарчадым. Мени каралаган Айжан күйөөсүнөн алчу нерсесин алды окшойт. Аккаунту өчтү, мага да жазбай калды. Менин сотто ишим жатканын билип туруп колдонуп кетти.

«МЕНИН ЖҮЗҮМ ЖОЛДОШУМДУН АЛДЫНДА АЧЫК»
-Үй-бүлөдө таарыныч болот. Жолдошума таарынып, анын өзгөрүшүнө убакыт бергем. Жыйынтык чыкпаган соң арыз менен кайрылгам. Аны эбак күйөөсү менен ажырашкан Айжан билип, мени атайылап күйөөсүнө жабыштырып, өз кызыкчылыгына колдонуп, түрдүү аккаунттар менен каралады. Аны текшерүү максатында Балиде эс алган сүрөт киргизсем, «күйөөм менен эс алып жүрөт» деп чыкты.
Балдар үчүн жашаш керек, үй-бүлөнү сакташ керек, муну билем, муну түшүнөм. Менин жүзүм жолдошумдун алдында ачык. Жаман жолго барган эмесмин, аны ал билет. Бардыгы Урматтан көз каранды. Күйөөм менен жарашып жашаймынбы же жокпу, ал Урматтын кадамына жараша болот. Жадакалса чет жакта эс алууга жолдошум экөөбүзгө жолдомолорду алчумун. Айтор, мамилебиздин оңдолушуна аракетим көп болду.

Сүйүн Кулматова
star@super.kg