Май айында Баткендин Кадамжай районунда каналдан 39 жаштагы аялдын мыкаачылык менен өлтүрүлгөн жансыз денеси табылган. Туура бир жарым айдан соң маркумду өлтүрүүгө шектелип анын кайын сиңдиси менен күйөө баласы кармалды. Тааныгандар шайыр жана эч кимге зыяны жок деп сүрөттөгөн Нуржамал Алыкулованын аёосуздук менен өлтүрүлүшүнө эмне себеп болгондугу анын жакындарына азыр да табышмак.

«МУРДАТАН ПЛАНДАП ЖҮРҮШҮПТҮР»
Окуя тууралуу Баткен ОИИБинин басма сөз катчысы Дамира Юсупова төмөнкүлөргө токтолду:
-18-май күнү Баткендин Кадамжай районунун Кыргыз-Кыштак айылында каналдан 39 жаштагы аялдын жансыз денеси табылган. Ал Кадамжай районунун Чоң-Кара айылынын тургуну Нуржамал Алыкулова экендиги аныкталган. Соттук-медициналык экспертиза маркумдун оң жак баш сөөгү урулуп айрылганын, оң жана сол бетинде тактар бар экенин жана моюну жана омуртка сөөктөрү сынганын аныктаган. Ошондой эле жүлүнүндө жана баш мээсинде жабык түрдөгү жаракаты, анда кан уюганы аныкталган.

Бул жагдай боюнча 18-июнь күнү Кадамжай РИИБинин тергөө кызматы тарабынан киши өлтүрүү беренеси боюнча кылмыш иши козголгон. Кылмышка шектелип 1990-жылы туулган А.А. аттуу маркумдун кайын сиңдиси жана 1992-жылы туулган кайын сиңдисинин күйөөсү кармалып, убактылуу кармоочу жайга киргизилди. Шектүүлөрдүн көрсөтмөсүнө ылайык, маркум келин болуп келгенден бери күйөөсү экөөнүн ортосунда араздашуулар болуп келген. Келининин айынан апасы уулу менен катташпай калган. Кылмышка шектүүлөр ошол себептүү буга чейин да аны өлтүрүүнү ойлоп, ыңгайлуу мүмкүнчүлүктү издеп жүрүшүптүр. Ошол күнү келин уктап жатканда башына таш менен чаап, муунтуп өлтүрүп, андан кийин үйүнөн 20-30 метр алыстыктагы каналга алып барып ыргытып салышкан. Кайненеси окуя тууралуу эртеси күнү билген. Учурда тергөө амалдары жүрүп жатат.

«СИҢДИМ ӨЛТҮРҮЛГӨНДӨН КИЙИН СУУГА ЫРГЫТЫЛЫПТЫР»
Бир тууган сиңдисинен айрылып, дагы эле көз жашы кургай элек Шаадат Мендыбаева сиңдиси тууралуу төмөнкүлөрдү айтып берди:
- Өлүкканадан өлүктү таануу үчүн киргенде анын бети-башынан, моюнунан тактарды көрдүм. Буга чейин сууга чөгүп өлгөндөрдү көргөм. Алар шишип таанылбай калышкан эле. Сиңдим шишибептир. Баштары жарылып, таш же балтанын арты менен ургандай маңдайы жарылган, моюнунда кулагынын артына чейин жиптин изи кирип кетиптир, сол көзү көгөрүп калыптыр. Чыгып күйөө баламдан эмне болгонун сурадым. Ал «сууга чөгүп каза болду, андан башка эч кандай вариант болушу мүмкүн эмес» деди.

Кийин соттук-медициналык экспертизадан киши колдуу болуп каза болгону аныкталды. Бөйрөгүндө да, ашказанында да суу жок, өлтүрүлгөндөн кийин сууга ыргытылган экен.

Сиңдим менен аны өлтүргөн кайын сиңдиси бир үйдө жашачу. 4 бөлмөлүү үйдүн
1 бөлмөсүндө сиңдим күйөөсү жана 5 баласы менен, 3 бөлмөсүндө кайын сиңдиси күйөөсү жана 3 баласы менен жашачу. Кайненеси ушинтип бөлүштүрүп берип койгон. Кайненеси булардан бөлөк жашачу. Бир үйдө жашагандыктанбы, сиңдим менен кайын сиңдиси экөөнүн ортосунда пикир келишпестиктер, кайым айтышуулар көп болчу экен. Майдын 17си күнү сиңдимдин улуу кызы короодогу бир түп гиласка чыгыптыр. Аны көргөн кайын сиңдиси «Ушул гиласты да түгөтмөй болдуңар. Бир күнү силердин түбүңөргө жетем» деген экен. Бул сөзгө сиңдим капа болсо, кызы «апа, көңүл бурбаңызчы, айтып жүргөн эле сөзү да» деген экен.

«КАЙНЕНЕСИ ӨЛҮГҮҢӨРДҮ АЛЫП КЕТКИЛЕ ДЕГЕНГЕ ЧЕЙИН БАРДЫ»
-Өлүктү үйгө алып барганда кайненеси, кайын сиңдиси, күйөө баласы бир жолу да баш багышкан жок, эмне болгонун сурап да келишкен жок. Ал тараптан кайгырууну сезген жокпуз. Ал жакта да «силер кылдыңар. 18 жылдан бери силер менен чогуу жашап жатса, кантип билбей калдыңар?» деп айттык. Ошондон улам пикир келишпестиктер болуп, кайненеси «өлүгүңөрдү алып кеткиле» дегенге чейин барды. Акыры маркумду ошол жакка коюп, айт, кырк ашын апамдын үйүнөн өткөрдүк. Башынан эле ошол адамдардан шекшип жатканбыз. Күйөө баламдын катыштыгы бар деп айта албайм. Бирок ким өлтүргөнүн билет. Билген үчүн издеп, кайгырган жок.

Күйөө балам деле сиңдимди көп сабачу экен. Бизге сиңдим андайларды айтчу эмес. Сиңдимдин эң чоң катасы – күйөөсүн өтө жакшы көргөндүгүндө. Кордугуна, сабаганына кайыл болуп балдары үчүн жашай берген экен. Жашоосундагы кыйынчылыктарды каза болгондон кийин досторунан билип жатабыз. Өлтүргөндөн көрө ажырашып кетишсе эмне, 5 эмес, 10 баласы болсо да багып алат элек. Атам менен апам ыйласа жанында адам тура албайт. Ата-энемдин үйүнө келгенге да жүрөгүм чыдабай жатат. Өзүм да үйдөгүлөргө көрсөтпөй ыйлап алам. Бир тууган деген кыйын экен. Адилеттүүлүктү күтөбүз. Күнөөлүүлөр мыйзам чегинде жаза алышсын деп жаңжал кылбай, сабыр кылып отурабыз.

«КЫЗЫМДЫ КЫЙНАП ЖАТЫШКАНДА АЛ АПА ДЕП КЫЙКЫРДЫ БЕКЕН?..»
Кызынын өлүм алдындагы абалын ойлогондо кирерге жер таппай, көз жашын тыя албай отурган маркумдун энеси Санталат Алыкулова да арманын айтып берди:
-Жаркылдап жүргөн аймончоктой кызым бир күнү эле жок. Ыйлагандан башка колубуздан эч нерсе келбейт экен. Үйгө келип калганда денесинин көгөргөнүн көрчүмүн. Бирок сурасам эч нерсе айтып берчү эмес. Кайненеси урганын билчүмүн. Бир ирет кызым эшиктен кирип баратса таш ыргыткан экен, таш кызыма эмес, жээниме тийип, анын башы жарылып ооруканада жүрүшкөн. Кайненесинин мүнөзү ошондой экен. Кызым «ал келе жатса калтырап корком, уруша берет» деп айткан. Кайненеси, кайын сиңдиси менен күйөө баласы эле өлтүрдү. Башка душманы жок.

Күйөө балам мурда кызымды сабап жүрчү. Бирок эки жылдан бери өзгөрүп, турмушка олуттуу карап сабабай калган.

Кызым бирөө менен урушса да, кечирип сүйлөшүп жүрө берчү. Коңшулары да кызымдын кайненесинен коркушат экен. Ошондуктан көп нерсе айтпай жатышат. Мен өзүмө келе албай жатам. Байкуш кызым канча кыйналды экен, апа деп кыйкырды бекен? Ойлосом чыдабай кетем. Ата-энени баласынан ажыратпасын. Эми акыйкат болсун, өлтүргөндөр тиешелүү жазасын алсын!

«БАЛДАРЫМДЫ КАРАП ТУРУП СЫЗДАП КЕТЕМ»
5 баласы менен жалгыз калган маркумдун күйөөсү Мирлан Арзыбаев аялын карындашы менен күйөө баласы өлтүргөн болсо тиешелүү жазасын алышы керек дейт:

Эмне себептен мындай каргашалуу окуя болуп кеткенин мен да билгим келет. Аялымды ким өлтүргөнүн билсем, ушунча күн унчукпай жүрө бермек белем? Аялым менен карындашымдын ортосунда жаман мамилени байкаган эмесмин. Апам болсо 5-6 жылдан бери башка жакта жашайт. Апам экөөнүн урушканын да, жакын мамилесин да байкаган эмесмин. Апам урчу бекен, аны апамдын өзүнөн сурагыла. Карындашым менен бир үйдө жашаганыбыз менен, үй талашып урушчу эмеспиз. Жаштыгыбызда жубайыма кээде кол көтөргөнүмдү танбайм. Кийин урбай калгам.

Аялым жакшы адам болчу. Ал мага 5 бала төрөп берди. Экөөбүз сүйүшүп турмуш курганбыз. Эл катары эле жашап жатканбыз. Менин башыма түшкөн бул күндөрдү эч кимдин башына салбасын. Аялымдын каза болгону мага катуу сокку болду. Кыйын күндө калдым, балдарымды карап туруп сыздап кетем. Алар апалап ыйласа, «мен бармын, ыйлабагыла» деп сооротуп жатам. Азыр эч ким менен сүйлөшкүм келбей калды.

Перизат Музуратбекова
koom@super.kg