2019-жылдын 5-январынан 1-февралына чейин Бириккен Араб Эмираттарында Азия Кубогу өтөт. Бул мелдеш жалпы эле Кыргыз спортунун тарыхында жазылып калары талашсыз. Себеби футбол боюнча Кыргыз улуттук курама командасы өз тарыхында биринчи ирет беделдүү турнирге катышканы турат.

АЗИЯ КУБОГУНУН ТАРЫХЫ

Азия Кубогу – Азия чөлкөмүндөгү футбол боюнча улуттук курамалар арасындагы эң ири мелдеш. Турнир 4 жылда бир өткөрүлүп келет. Алгачкы мелдеш 1956-жылы Гонконгдо болуп, анда Түштүк Корея курамасы Израилди утуп чемпион аталган. 2004-жылга чейин аталган мелдеште 12 гана өлкөнүн курамалары күч сынашып келген болсо, андан кийин 16 курама катыша турган болгон. 2014-жылы АФКнын жетекчилери Азия Кубогунун финалдык бөлүгүндө 24 курама команда катыша турган кылып регламентке кайрадан өзгөртүү киргизишкен. Бул сапар 17-ирет өткөрүлүп жаткан Азия Кубогу Бириккен Араб Эмираттарынын 4 шаарындагы 8 стадиондо өтөт.

УЛУТТУК КУРАМДЫН БАСЫП ӨТКӨН ЖОЛУ

Азия Кубогуна тандап алуу турунун 1-этабында (2018-жылкы Дүйнө чемпиондугунун тандап алуу этабы менен бирге) Кыргыз курамасы Австралия, Иордания, Тажикстан жана Бангладеш курамалары менен бир тайпада оюн көргөзгөн. Анын жыйынтыгында Кыргыз курамасы 4 жеңиш, 2 тең чыгуу жана 2 жеңилүү менен 14 упай алган. Бул көрсөткүч менен турнирдик жадыбалда 3-орунду ээлеп, кийинки этапка өткөн.

Азия Кубогуна тандап алуу турунун кийинки этабында курама командабыз Индия, Мьянма жана Макао курамалары менен кез келген. Бул этапта Кыргыз курамасы 4 жолу каршылаштарын жеңип, 1 жолу тең чыгып жана 1 оюнда утулуп калган. Жыйынтыгында 13 упай топтоо менен курама команда Азия Кубогунун финалдык этабына жолдомо алган.

КЫРГЫЗСТАН «С» ТАЙПАСЫНДА

Улуттук курамдын оюндары (Бишкек убактысы боюнча):

Кытай – Кыргыз Республикасы. 7-январь, 17:00

Кыргыз Республикасы – Түштүк Корея. 11-январь, 22:00

Кыргыз Республикасы – Филиппин. 16-январь, 19:30

АТААНДАШ КОМАНДАЛАР:

Түштүк Корея курамасы

Дүйнө рейтингинде: 53-орунда

Жетишкендиктери: Дүйнө чемпиондугунда 4-орун (2002-жыл), Азия чемпиону (1956 жана 1960-жылдары)

Башкы машыктыруучусу: Паулу Бенту

«Тоттенхэм Хотспур» клубунун негизги оюнчусу Сон Хин Мин баштаган Түштүк Корея курамасы бул тайпанын гана эмес, жалпы турнирдин негизги фаворити катары саналат. Азия чөлкөмүндөгү күчтүү командалардын катарын толуктаган Түштүк Корея курамасы Азия Кубогуна жалпы 13 жолу катышып, 2 жолу чемпион аталышкан. Ошондой эле бул курама Азиядагы башка мамлекеттерге салыштырмалуу дүйнөлүк мундиалга эң көп катышкан курам. Тагыраагы, 10 жолу Дүйнө чемпиондугунда оюн көргөзүп, 2002-жылы жарым финалга чейин жете алган.

КЫТАЙ КУРАМАСЫ

Дүйнө рейтингинде: 76-орунда жайгашкан

Жетишкендиктери: Азия Кубогунун күмүш медалынын (1984 жана 2004-жылдары) жана коло медалынын (1976 жана 1992-жылдары) ээси

Башкы машыктыруучу: Марчелло Липпи

Кытай курама командасы Азия Кубогунун финалдык этабына жалпы 11 жолу катышкан. Дүйнөлүк биринчиликте Кытай курамасы 1 жолу катышып (2002-жылы), тайпалык баскычтан чыкпай калган. Кытай акыркы жылдары футболго миллиарддаган акчаларды жумшап жатканы маалым. 2016-жылы жергиликтүү Футбол федерациясы өлкө курама командасынын деңгээлин көтөрүү максатында италиялык машыктыруучу Марчелло Липпини чакырган. Липпи 2006-жылы Италия курамасы менен дүйнө биринчилигин багындырган тажрыйбасы мол адис.

Кыргыз курамасы Кытай менен буга чейин 3 жолу каршы ойноп, бардыгында жеңилүү ызасын тартышкан. Алдыда боло турган оюн тууралуу улуттук курамдын оюнчусу Эдгар Бернхард төмөнкүлөргө токтолду:

– Мындан 4 жыл мурунку оюнда Кытай курамасы кыска пастар менен динамикалуу ойной алган күчтүү оюнчулары бар экенин көргөзгөн. Азия Кубогунда боло турган оюн реванштык беттеш болмокчу.

ФИЛИППИН КУРАМАСЫ

Дүйнө рейтингинде 116-орунда жайгашкан

Башкы машыктыруучу: Свен-Ёран Эрикссон

Филиппин курама командасы да Азия Кубогуна алгачкы ирет катышууда. Филиппин биздин курам үчүн ыңгайсыз каршылаш. Анткени буга чейин болгон эки беттеште тең утулууга дуушар болгонбуз. Үчүнчү беттеште жеңиш биз тарапта болорунан үмүт чоң.

МЕЛДЕШКЕ ДАЯРДЫК МЫКТЫ

25-декабрда "Ак шумкарлар" Катар курамасы менен кез келип, 0:1 эсебинде жеңилди.

Мелдеш алдындагы акыркы достук беттеш 31-декабрь күнү Палестина курама командасы менен болмокчу.

КЫРГЫЗСТАН КАНЧАГА ЧЕЙИН БАРА АЛАТ?

Улуттук курама командабыздын башкы машыктыруучусу Александр Крестинин бул мелдеш тууралуу:

– Эң алгач бул мелдеш биз үчүн кызыктуу жана жаңы тажрыйба болот. Биз мелдешке статист катары эмес, толук кандуу атаандаштык түзө турган команда катары катышабыз. Биз плей-офф баскычына чыгуу үчүн күрөшөбүз.

Кыргыз өлкөсү Азия Кубогунун финалдык бөлүгүндө алгачкы ирет ойноп жатканы эле чоң ийгилик. Бирок тайпадан чыгууга мүмкүнчүлүк бар. Болгону ал мүмкүнчүлүктү туура пайдалануу зарыл. Тайпадан чыкпай калсак бул чоң трагедия болбойт. Жеңген учурда мактап коюп, жеңилсе сөкпөй, жеңсе да, жеңилсе да оюнчуларды колдой билген чыныгы күйөрман бололу.

Кубан Жумамидинов
sport@super.kg