ТҮШТҮК КОРЕЯНЫН ЭҢ КЫМБАТ АКТЁРУ КИМ СУ ХЁН

ТҮНТ МҮНӨЗҮНӨН УЛАМ АКТЁРДУК КЕСИПТИ ТАНДАГАН

Кыргыз көрөрмандары дагы анын «Бийик кыялдан» дорамасын көрүшсө керек. Бирок аны көптөгөн өлкөлөргө тааныткан «Айдын кучагындагы Күн» тарыхый сериалы болду. 2012-жылы жарык көргөн бул сериал азыркы убакка чейин жогорку рейтингдеги сериалдардын катарынан түшпөй келет. Албетте, мындай жогорку рейтингди багындырууга Ким Су Хёндун салымы чоң болчу. Анын да эмгеги бааланып, «Эң мыкты актёр» наамын жеңип алган. Мен-мен деген актёрлордун арасынан наамды утуп алган Су Хён: «Наамды алганыма кубанып да, уялып да турам. Бул наамга татыктуу экенимди дайыма далилдеп турушум керек»,- деп сахнадан ыраазычылыгын билдирген.

Популярдуулуктун артынан киного, ар кандай жарнамалык роликтерге сунуштар жамгырдай жааган. Ал бир учурда Кореядагы 17 брендге модель болуп, андан сырткары Кытайда «Coca-Cola», «Samsung Electronics» сындуу ири компаниялардын жүзү болгон. 2012-2013-жылдары Су Хёндун сүрөтү дээрлик бардык атактуу тамак-аш, косметика, техника компанияларынын продуктыларына чапталып калган. Ошол кездеги жарнамалык келишимдер үчүн алган гонорары 2 миллион долларга жетсе, сериалдагы ар бир серия үчүн 84 миң доллар акы алып турган.

Голливуддун «Оушендин он бир досу» тасмасынын корейче варианты тартылып, «Уурулар» аталган тасма Ким Су Хёндун толук метраждуу тасмадагы алгачкы дебюттук ролу.

Актёрдун карьерасындагы дагы бир ийгиликтүү жана кирешелүү ролу болуп 2013-жылы тартылган фантастика, романтика жанрындагы «Жылдыздан келген адам» дорамасы эсептелет. Дорамада анын өнөктөшү – Азия, Европага таанымал актриса Чон Жи Хён.

Су Хён 2017-жылы «Чыныгылар» («Настоящие») тасмасына тартылган. Бул тасмага актёр өз чөнтөгүнөн 7 миллион доллар каражат кошкону айтылат.

Бирок тасма тартуучу топ күткөн ийгиликке жетпей, коомчулук тарабынан жакшы кабыл алынган эмес. Ошол эле жылдын аягында аскердик кызмат өтөөгө кеткен Су Хёнду күткөндөр көп эле. Ал келди. Келгенде да экранга ийгиликтүү кайтты.

Сериал сүйүүчүлөрү учурда «Жиндимин, бирок баары ойдогудай» дорамасынын ар бир сериясын кууп көрүп жатышат. Андагы башкы каарман Мун Кан Тэнин ролунда биз сөз кылып жаткан актёр Ким Су Хён. «Мун Кан Тэ дайыма чарчап жүргөн, өзүнө убактысы жок, бирок күчтүү, камкор адамдын ролунда. Тасмада Мун Кан Тэ менен Го Мун Ён акырындап бири-биринин жан дүйнөсүн айыктыргандай сезилет. Экөөнүн кемчи

ликтерин, артыкчылыктарын карап отуруп ар бирибиз сабак алсак керек»,- дейт дорама тууралуу актёр.

«Жиндимин, бирок баары ойдогудай» сериалына тартылуу менен Ким Су Хён кайрадан эң кымбат актёр статусун жаңылады. Ал сериалдагы ар бир серия үчүн 168 миң доллардын тегерегиндеги гонорар алары айтылууда. Акыркы жылдардагы кымбат гонорарды Ли Бёң Хон 2018-жылы чыккан «Мистер Саншайн» дорамасында (ар бир серия үчүн 130 миң доллар) алганы белгилүү.

Жогоруда айткандай, каарманыбызда ырчылык да талант бар. 2012-жылы Лондондо өткөн Олимпиадада улуттук команданы колдоо максатында ыр жазып, ага клип да тарттырган. Адистер анда профессионал ырчы боло турган талант бар экенин айтышат. Ким Су Хёндун сериалдарга жазган бир нече саундтрегинен сырткары, музыкалык чарттарда ийгиликке жетишкен ырлары бар.

Спорт менен активдүү машыгат. Велосипед тээп сейилдегенди, кышкысын лыжа тепкенди жактырат. Футбол, бадминтон, боулинг ойногондордун катарында. Сууда сүзүүнү жактырат. Анан да фотоаппаратын көтөрүп алып кызыктуу кадрларды сүрөткө тарткандан ырахат аларын айтат.