Ошентип, көптөн күткөн Гуанчжоудагы Азия оюндары да сапарын карытып баратат. Бул спорттук чоң майрамда биздин спортчулар да ысымдарын тарых барактарына калтыра алышты. Аны менен бирге кыргыз элине чексиз кубаныч, сыймык тартуулашты.

ЕВГЕНИЙ ВАККЕРДИН КЕРЕМЕТ ЖЕҢИШИ
Кыргыз журту биринчи медалды туптуура 8 күн күттү. Үзүлбөгөн үмүт 20-ноябрда гана жарк этти. Ушул күнү Ваккер веложарыш боюнча күмүш медаль тартуулады. 54 чакырымдык жарышта Евгений Азия оюндарынын чемпиону кореялык Чоу Хуёнгминди гана алдыга өткөрүп, калгандарын артка калтырды.
Өзүнүн жеңиши тууралуу спортчубуз: “Бул менин карьерамдагы эң оор жарыш болду. Мелдешке чыгып жатып медаль үчүн 100 пайыз аракет кылуу аздык кыларын түшүнүп турдум. Аралыктын кээ бир жерлеринде ушул 54 чакырым эч качан бүтпөй тургандай сезилип жатты. Жеңишимди Кыргызстанга, күйөрмандарыма арнайм!”- деп билдирди.
Айта кетчү нерсе, оюндардын башталышына 10 күн калганда Евгений ооруканадан чыккан эле. Андыктан толук калыбына келе элек оюнчубуз оюндарга аттанган. Ден соолугунун начардыгына карабай күмүш медалды жеңип отурат. Бул керемет эмей эмне?!

КАНЫБЕКТЕН АЛТЫНГА ТЕТЕ КҮМҮШ
Баарыбыз балбандардан чыдамсыздык менен күткөн байгени грек-рим күрөшү боюнча жаш спортчубуз Каныбек Жолчубеков алып келди. 55 килограмм салмактагы жердешибиз медаль үчүн 4 беттеш өткөргөн. Айта кетчү нерсе, балбандарыбыз бир канча мелдешке бир күндүн ичинде чыгышты.
Биринчи кармашта Каныбек өзбек балбанына туш келип, кармашта 3:0 эсебинде жеңишке жетишет. Экинчи беттеште кытай спортчусун 3:0 эсебинде багындыра алды. Жарым финалда ирактык балбан менен күч сынашып, 3:1 эсебинде ийгиликке жетишти. Ал эми алтын медаль үчүн болгон күрөштө күн чыгыш өлкөсү болгон Япониянын спортчусуна туш келген. Тилекке каршы, алда канча тажрыйбалуу япон күрөшчүсүнүн далысын жер жыттата албады. Каныбектин атаандашы 5 жашка улуу экен, бул да таасирин тийгизди окшойт. Эсеп 0:5 болду.
Кандай болгон күндө да Жолчубековдун күмүш медалы кыргыз элинин XVI Азия оюндарындагы алтынга тете медалы болуп тарыхта калды.

ДАНИЯР КӨБӨНОВДУН ЭРДИГИ
Ваккердин медалы ак жолтой болгон сыягы. Анын байгесинин артынан биздин команданын капчыгына медалдар келип түшө баштады. Ошентип, баарыбыз чыдамсыздык менен күткөн алтын медалды грек-рим күрөшүнүн чебери Данияр Көбөнов тартуу кылды. Алтын медаль менен кошо элибизге чексиз кубаныч, сыймык тартуулай алды. 74 килограмм салмактагы балбаныбыз алгач индиялык балбанга туш келип, 3:0 эсебинде утуп алды. Андан кийинки беттеште казак балбаны менен таймашып, аны 3:1 эсебинде багындырды. Жарым финалда кореялык спортчуну 5:0 эсебинде далысын жер жыттатты. Акыркы таймашта япониялык балбанды 3:0 эсебинде жеңип, ортодогу калыс Даниярдын колун обого көтөрдү. Казак кошунабызга гана бир упай “жедирип”, калганын “сухой” эсеп менен утушу балбаныбыздын чеберчилиги жогору экенин айтып турду. Даниярдын бул алтыны Кыргызстандын Азия оюндарынын тарыхындагы 3-алтын медалы. Буга чейин 14-оюндарда жеңил атлетикадан 2 алтын медалга жетишкенбиз. Андан сырткары Көбөнов 2010- жылы Москва шаарында болуп өткөн Дүйнө биринчилигинде коло медалын жеңип алган.
Ошентип, кыргыз желеги асманга көтөрүлүп, гимн ойнолуп, ак мөңгүлүү кыргыз жери дүйнөгө даңкталды.

ЖАНАРБЕКТЕН КОЛО МЕДАЛЬ
Грек-рим күрөшү боюнча балбаныбыз Жанарбек Кенжеев коло медаль алууга жетишти. 84 килограммдагы спортчубуз биринчи ирет япон спортчусу менен чыгып, 3:0 эсебинде утушка ээ болду. Тилекке каршы, экинчи беттеште Ирандын балбанына 1:3 эсебинде жеңишти тарттырып жиберген. Ошентсе да коло медаль үчүн болгон аракетин жумшап, Катар мамлекетинин балбанын 3:0 эсебинде жеңип алган. Ал эми коло үчүн болгон беттеште Кенжеев индиялык спортчунун үстүнөн да 3:0 эсебинде өз үстөмдүгүн көрсөттү. Кыргыз желеги дагы бир ирет асманга көтөрүлүп, капчыгыбызга медаль кошулду.

АЛЕКСАНДР ПАРОЛДОН “СЮРПРИЗ”
25-ноябрь күнү Кытай жергесинен дагы бир сүйүнүчтүү кабар келди. Кайыкта сүзүп жарышууда (байдарка) спортчубуз Александр Пароль коло медалды камсыз кылды. Ал 1000 метрге болгон жарышта 3 мүнөт 38 секунд убакта келип, сыйлоо аземинде кыргыз желегин дагы бир жолу көкөлөттү.
Андан сырткары эркин күрөш боюнча балбаныбыз Ильгиз Жакыпбеков, грек-рим күрөшчүбүз Азамат Эркимбаев 4-орундарга татышты.

Залкарбек Карабалаев
sport@super.kg