Депутат Айгүл Айдаровага байланышкан чуулгандуу видеодон кийин коомчулукта суроолор жаралганы ырас. “Мен парламентте ички иштер министрин сындагандан кийин каралоолор башталды. "Тыйылбасаң мындан башка да видеолор бар, чыгарып салабыз" деп “салам-дуба” айттырып шантаж кылып жатышат” дейт. Калган сөздү депутат айым өзү улантсын. 

– Кандайсыз, Айгүл айым? Сизге байланышкан аудио, видеолор интернет желесине тарап кетти. Коомчулуктагы сын-пикирлер катуу тийип жаткандыр. Бул ишти уюштургандардын артында ким турат деп ойлойсуз?

– Мага байланышкан чуулгандуу видео, аудио жазуулардын тарап кетишине кимдер кызыкдар болгонун баары эле билип калышты. Акыркы учурларда мага ИИМдин ишине нааразы болуп көп жарандар кайрылып жүрүшөт. Андай даттануулардын бирин парламент жыйынынан айтып чыксам аталган министрликке катуу тийди окшойт. Монтаж, шантаж сыяктуу ыплас иштер менен мени сындыра алышпайт. Аял катары назик болгонум менен, мындай каралоолор, тескерисинче, мага дем-күч берет. Бул окуяда мага колдоо көрсөткөндөр көп болду. Бирок жеке таарынычы барлар же мыйзамсыз демилгелери парламенттен өтпөй калгандардын баары мүмкүнчүлүктөн пайдаланып тепкилеп, табасы канып калышты. Негизи депутат болгон соң ар бир кадамыбыз элдин көзөмөлүндө. ИИМдин кызматкерлерине кандай жол менен болсо да мени кылтакка илүү милдети тапшырылганын билгем. Анткени өзүм милициянын казанында кайнап, ашканасында бышкан адаммын. Кызматкерлер мындай ыплас иштер мыйзамсыз экенин билишет, бирок үчүнчү күчтөргө же дагы башкасына оодара салуу аларга көнүмүш адат болуп калбадыбы. Шантаж демекчи, азыр деле чындыкка жакындабаган бир нече видеолорду интернетке чыгаруу аракетин көрүп жүрүшөт. “Эгер тыйылбаса башка да видеолорду жарыялайбыз” деп мага “салам-дуба” айттырып жаткандарына жол болсун. Азыр технология өнүккөн заман, уйду койдой мааратып койсо болот. Эң негизгиси, мындай жол менен мени ИИМ да, башкасы да сындыра албайт.

– Сиз депутат болуп келген “Бүтүн Кыргызстандын” лидери Адахан Мадумаров жакында камактан бошотулду. Ага жолугуп сүйлөштүңүзбү?

– Ооба, партиянын лидери Адахан Кимсанбаевич камактан чыкты. Бирок аны менен жолуккан жокмун. Ал киши менин атымды ачык айтып сын жаадырбаса да, кыйытып айтып күнөөлүү издеп жатат. Ачыгын айтсам, ортобузда дал келишпеген көз караштар бар. Тилекке каршы, ошол майда нерсени тоодой кылып интрига жасагандар жок эмес. Партиялаштарды ич ара бири-бирине каршы тукурсак, бүтүндүгүнө доо кетирсек деп аракет кылгандар болду жана дагы деле болуп жатат. Лидерибиз мага жөн гана ишенбестик көрсөтүп жатабы же башка себеби барбы, кыскасы, мен ага көңүл бурбай иштей берүүнү чечтим. Пейилибиз, ниетибиз ак болсо болду, кимдин-ким экени бат эле билинип калат. Партиянын ички абалына кенен токтолуп, ачык жарыялагым келбейт.

– Парламентте жеке пикири жок, бирөөлөрдүн буюртмасы менен мыйзам долбоорун даярдап же демилге көтөргөн кесиптештериңиз көппү? Аларга көз карашыңыз кандай?

– Ооба, Жогорку Кеңеште бирөөнүн жеке буюртмасы менен демилге көтөргөн депутаттар бар. Сунуштаган мыйзам долбоорунун мамлекетке пайдасы жок, тескерисинче, зыян экенин билип турса да, жеке кызыкчылыгын көздөп парламенттен өткөрүүгө жан талашышат. Мен андай учурда кабыл алынуучу мыйзам канчалык элге кызмат кылат деп талдоого аракет жасайм. Менин коргой турган же жоготуп жиберем деп корккудай байлыгым жок. Жакпаса “колдобойм” деп ачык эле айтам.

– Бишкектеги 17-май күнкү массалык ызы-чуу, чет өлкөлүк студенттердин сабалышы талкууда. Сиз кандай пикирдесиз ал окуя боюнча?

– Аткаруу бийлиги шалаакылык кылып өз милдетин так аткарбай жатат. Эмгек, социалдык камсыздоо жана миграция министрлиги менен бирдиктүү иш алып барбайт, чет элдик жарандар тийиштүү уруксаты жок ишке орношуп жатышат. Курулушта, тигүү ишканаларында, таксиде, жеткирүү кызматтарында мыйзамсыз эле иштеп жүрүшпөйбү. Аларды мыйзам чегинде тартипке чакыруу зарылдыгы турат. ИИМ, Башкы прокуратура түздөн-түз ыйгарым укуктарын аткарышкан жок. ИИМ өз убагында алдын алуу иштерин жүргүзүп, убагында чара көргөндө мындай окуя болмок эмес. Биз, Жогорку Кеңеш, өкмөт суранган мыйзамдарды кабыл алып берип жатабыз, бирок аткаруу бийлиги кайдыгерлик кылып жатканына күбө болдук. Биздин жарандардын жана чет өлкөлүк жарандардын коопсуздугун ИИМ камсыздашы керек эле. Бирок алар бүгүнкү күнү саясатчылардын жеке жашоосун аңдуу менен алек. Дагы бир жолу айтам, өз милдетиңерди так аткара албасаңар, уят болбой кызматыңарды тапшырып кеткиле.

– “Карышкыр циркте ойнобойт” деп пост жазган экенсиз. Бул кимдир бирөөгө кыйытмабы?

– Эч кимге кыйытма айткан жокмун. Бирок өздөрүнө кабыл алган бир топ адамдар болду. Мен өзүмдүн жеке жашоомо кимдир бирөөлөрдүн арзан, өтпөй калган цирктеги номерлери менен кирип келишин каалабайм. Биринчи болуп катылбайм, бирок ким катылса сазайын берем. Өзүмдүн жеке аренам, жеке жашоом бар. Ал аренада жалгыз мен гана кожоюнмун!

– Мектеп окуучуларынын тамак-ашына мамлекеттен акча бөлүүнү токтотуш керек деп айтып чыккандай болдуңуз эле. Дагы эле ошол пикирдесизби?

– Мамлекеттен бөлүнгөн каражатты жоюп салуу деген сөздү кээ бир блогер, журналисттер тексттен жулуп алып, өздөрүнө керектүү жерин гана колдонушкан. Балдардын тамак-ашына бөлүнгөн каражат көбөйтүлгөнү менен, тамак-аштын сапатына көңүл бурган эч ким болгон жок. Окуучуларга колдонуу мөөнөтү өтүп кеткен тамак-аштар берилип жатканы тартылган видеолор бар менде. Болгону эмоциямды жашыра албай катуу айтып алгам. Адатта, менин эмоциям башкы планга чыгып, негизги маселе экинчи планда калып кетет. Андайда баягы эле жеп-жутарлар утушта болот экен. Учурда эмоциямды башкарып, маселеге басым жасоого аракет кылып жатам. Бирок мурдагыдай эле талапты катуу койгондон кайтпайм.

КЫСКА-НУСКА

– Журналисттердин кандай суроолору жакпайт?

– Жообун билип турса да, интрига жаратуу үчүн берип, жалган сөздөрдү териштирген суроолору жакпайт.

– Акыркы жолу көргөн киноңуз?

– “Бейиш эненин таманында” киносу. Абдан таасирдүү тасма экен.

– Фейк аккаунт колдоносузбу?

– Колдонбойм. Расмий баракчама араң убакыт табам.

– Жаңылыш сүйлөп уят болосузбу?

– Тирүү адам болгон соң, албетте, шашканда жаңылып сүйлөп алган учурлар болот.

– Жеке коопсуздугуңуз үчүн кабатырланган учур болгонбу?

– Менин коргоочум Жаратканым, ал канча өмүр берсе ошончо жашайм да. Көчөдө жөө басып, кеңири жүрө алам.

– “Даканса” деген сөздү кандай түшүнөсүз?

– Бул сөздү шылдың иретинде колдонуп жүрүшөт, бул туура эмес. Саясатта да маданияттуу күрөшүү керек. Тигил же бул тарапка ат коюу, келеке, шылдыңга алуу адамдын деңгээлин аныктайт.