2026-жылдын 5-июлунда Бишкектин Ак-Өргө конушунда 58 жаштагы жаран киши колдуу каза тапты. Кылмышка 68 жаштагы онколог врач шектелүүдө. Шектүү ага 20дан ашык ирет бычак сайганы тергөөнүн маалыматында айтылат. Белгилүүсү – кылмышка шектүү жаран үйүндө жалгыз жашап келген. 

Жанара Ботаева, маркумдун кызы: “ЖАМАН КАБАРДЫ ТҮНКҮ СААТ 11ДЕ УКТУК”

– Биз: атам Кубатбек Ботаев, апам, агам, мен жана менин кичине кызым болуп Бишкектин Ак-Өргө конушунда өз үйүбүздө турабыз. Каргашалуу окуя болгон күнү курбуларым менен тоого эс алууга кеткен элем. Апамдын айтымы боюнча, атам ошол күнү эртең менен саат 10дордо дүкөнгө барып келем деп велосипед тээп үйдөн чыгып кетет. Дүкөн үйүбүзгө жакын эле жерде. Негедир атам кечигет. Апам 1 сааттан кийин чалса, телефону үйдө калыптыр. Апам дүкөнгө издеп барса, ал жакта жок. Ары жактагы сейил бакка барып 2 саат күтүп отуруп, таппай кайра үйгө келет. Ошентип кеч кирет. Мен үйгө келдим, саат түнкү 10дон өтүп калган эле. Бир убакта үйгө милиция кызматкерлери келип, “бул Кубатбек Ботаевдин үйүбү? Ушундай ысымдуу кишини бычактап кетишиптир” дешет. Апам дүрбөлөң түшүп, үйгө өңү купкуу болуп кирип мага айтты. Нес болуп калдым. Бычактап салса, анда “Тез жардам” менен ооруканага алып кетишсе керек деп болгоолодук. Байкеме чалсак, унаасы менен келе калды. Кызымды алып төртөөбүз Ленин РИИБине бардык. Ал жактан “Бишкек шаардык ички иштер башкармалыгына баргыла. Иш ошол жактан карала турган болду” дешти. 

“АТАМДЫН СҮРӨТҮН КӨРСӨТКҮЛӨ, БАЛКИМ, БАШКАДЫР ДЕДИМ”

– Биз айтылган дарекке жеткиче түнкү саат 12 болуп кетти. Тергөөчүлөрдү күтүп туруп калдык. Нөөмөттөгү кызматкер бизден “силер кылмышка шектүүнүн жакыны болосуңарбы же көз жумган адамдынбы?” деп сурады. Шектүү адам милицияга өзү чалып кабарлаганын, чачын ак баскан улгайган эркек киши экенин айтты. Тергөөчүлөр бизди 3-кабатка алып жөнөгөндө карасак, коридордогу отургучта бир ак чач киши отуруптур. Мен дароо “атамды ушул киши өлтүрдүбү?” деп кыйкырдым. Ал ордунан тура калып “кармагыла, булар мага кол салышпасын” деп бакырды. Ошентип шектүү кишини көрдүк. “Шектүүнүн колуна эмне үчүн кишен салынган эмес? Эмнеге убактылуу кармоочу жайга камалган жок?” деп суроо узаттык. Тергөөчүлөр “ал азыр көрсөтмө берет, анан кишен салынат” деп жооп беришти. Көрсөтмө бердик. Үй-бүлөбүздүн атынан арызды мен жаздым. Бирок жазардан мурун “атамдын сүрөтүн көрсөткүлө, бычакталган адам, мүмкүн, башкадыр” дедим. Окуя кылмышка шектүүнүн үйүнүн жер төлөсүндө болуптур. Сүрөттөрдү көрсөтүштү. Кан жерге жайылып, ортосунда канга чыланган атам жатат. Кыскасы, мыкаачылык менен өлтүрүптүр. Денесине 20дан ашык ирет бычак сайылган дешти. Шектүү мас абалда болгон экен. Атам анын колунан бошонуп качып, эшик жакка жеткенде жыгылган окшойт, артына, таманына да сайыптыр.

“ӨМҮР БОЮ КАМАЛЫШЫН ТАЛАП КЫЛАБЫЗ”                                       

– Акыркы сапарга узатуу алдында агам жана атамдын 2 иниси атамды жууп чыгышты. Алар “байкуш агабыз колдору менен аябай эле коргонуптур. 2 колунун тең манжалары сайгыланыптыр” дешти.

Соттук-медициналык экспертиза алдын ала текшерүүнүн жыйынтыгын берди. Анда атамдын жүрөгү дароо токтобогону, кансырап, абдан кыйналып каза болгону жазылыптыр. Кылмышка шектүү өмүр бою онколог врач болуп иштеген 68 жаштагы Т.Б. деген адам экен. Атамды кайсы бир себеп менен үйүнө алдап алып кирип, жер төлөсүнө камап алып, анан өлтүргөн болуп жатат. Атам бир жолу апама “өзүбүз жактан бир врач менен таанышып калдым. Ал көп жериңиз ооруйт экен, мен жардам берем деп айтты” деген экен. Муну апам эми эстеп айтып жатат. Кылмышка шектүү бизге жакын эле жерде жашайт экен.

Соттук-медициналык экспертизанын акыркы жыйынтыгы 3 аптада чыгат, ошону күтүп жатабыз. Биз президентке жана укук коргоо органдарына кайрылып, тергөөнү жеке көзөмөлгө алууну, иштин мыйзам чегинде объективдүү иликтенишин жана сот процессинин ачык өтүшүн камсыз кылууну суранып жатабыз. Атамды тирилте албайбыз, бирок мындай ырайымсыз окуя дагы бир үй-бүлөнүн башына түшпөшү үчүн мыйзам өз күчүн көрсөтүшү керек. Атамды өлтүргөн кишиге өмүр бою камакка кесүү өкүмү чыгарылышын талап кылабыз.

“ҮЙДӨ ЖАЛГЫЗ ЖАШАЧУ ЭКЕН”                            

– Кылмышка шектүүнүн бир коңшусу имам экен. Андан жакындарыбыз сурашканда ошол күнү эртең менен атамды коңшусунун үйүнүн жанынан велосипедчен көргөнүн айтып берген. Анан мечитке кетип, түндө үйүнө келиптир. Ошого тигил үйдөгү ызы-чууну укпаган. Кылмышка шектүү ичкиликке жакын экендиги, ал үйдө көп жылдан бери жалгыз жашап келе жатканы айтылууда. Аялы, кыздары башка жакта жашашат экен. Ичкенде “белая горячкасы” кармаппы, айтор, тынчтык берчү эмес деп айтылып жатат.

Кылмышка шектүү адам кылмышын милицияга өзү чалып кабарлаган. Атамды үйүнүн жер төлөсүнө кантип киргизгени, эмне үчүн мыкаачылык менен өлтүргөнү белгисиз. Адамдардын өмүрүн сактайм деп  Гиппократтын антын берген врач ушинтип атамдын өмүрүн алды. 

“АГАМДЫН ТОЮН КӨРБӨЙ КЕТТИ”

– Атам ак көңүл, куулук-шумдугу жок жакшы адам эле. 5-6 жылдан бери шаардагы май куюучу жайлардын биринде оператор болуп иштеп келе жаткан. Андан мурун бир топ жыл маршруттук такси айдап, бизди бакты. Эч жери ооручу эмес, ооруканага да жатып көргөн эмес болчу. Кээде жумуштан чыгарда бизге чалчу. Биз апам, кызым үчөөбүз ылдый жактагы сейил бакка барып атамды күтүп алчубуз. Ал тоок гриль же башка нерсе ала келе жаткан болот. Ошентип сейил бакта пикник кылып, анан үйгө кайтчу элек. Ушул күздө агамды үйлөнтөбүз деп корообузда жаңы үйдүн курулушун баштаганбыз. Тилекке каршы, агамдын тоюн көрбөй, келининин колунан чай ичпей кетти.                                    

Шердор Абдыкапаров, жабырлануучу тараптын адвокаты: “МЫКААЧЫЛЫК МЕНЕН ӨЛТҮРҮЛГӨН”

– Маркум өзгөчө мыкаачылык менен өлтүрүлгөн. Бычактан алынган жаракаттардын көбү жашоого эң керектүү органдар тарабында экен. Манжалар арасындагы жаракаттары анын коргонууга жасаган аракеттерин далилдеши мүмкүн. Учурда кылмыш иши Бишкек шаардык ички иштер башкармалыгынын тергөө кызматы тарабынан тергелүүдө. Тагылган беренелер шектүүнү 12 жылдан 15 жылга чейин же өмүр бою эркинен ажыратууну карайт. 

Бишкек ШИИББ: “АДАМ ӨЛТҮРҮҮ БЕРЕНЕСИ БОЮНЧА КЫЛМЫШ ИШИ КОЗГОЛДУ”                 

 – Каргашалуу окуя 2026-жылдын 5-июлунда Ак-Өргө конушунда болуп өткөн. Мас абалындагы эркек киши башка эркек кишини бычак менен сайып өлтүргөн. Кылмыш-жаза кодексинин Адам өлтүрүү беренеси боюнча кылмыш иши козголгон. Кылмышка шектүү №1 тергөө абагына киргизилди.

Криминалдык статистика

(Маалыматты Улуттук статистикалык комитет Башкы прокуратурага шилтеме берүү менен маалымдаган).

Кыргызстанда 2026-жылдын 1-январынан тартып 31-майына чейин 16 миң кылмыш иши катталган. Бул 2025-жылдын аталган айлар аралыгында катталган кылмыштардын санына караганда 13,5 пайыз жогору.  Мисалы, алдамчылык 1,7 эсе өскөн. 16 миң кылмыштын 2 миң 218и оор жана өзгөчө оор деп табылган.

Канымжан Усупбекова