– Азимбек Анаркулович, кош келипсиз, суроолорго жооп берүүгө даярсызбы?
– Даярмын.
– 24-март, 7-апрелдеги революцияларга көз карашы­ңыз кандай?
– Максатыбыз бийликке келиш эмес, Кыргызстандагы үй-бүлөлүк башкаруу системасын жок кылып, мамлекетти демократиялык жолго салуу, элдин үнүн угуу болчу. Революциянын максаттарынын ишке ашыкканына ыраазы болом. Кызматтан четтедим деп өкүнбөйм. Кызмат, байлык – колдун кири.
– Сиз 24-март менен 7-апрелдин кайсынысын белгилейсиз?
– Тарыхый окуялардын кыймылдаткыч күчү – карапайым эл жана кыргыздын жаштары. Эки дата каалайбызбы, каалабайбызбы, тарыхый күн болуп кала берет. Бирок кыргыз улуту бул окуяны оң жагынан тарыхта калтырышыбыз керек. Баңгилердин же хулигандардын аркасы менен болгон окуя дегенге болбойт. Куттуу жерде айтып коёюн, эч ким акча берип, революция жасап элди көтөргөн жок. Окурманга айтарым, тарыхтын алдында баарыбыз бирдей туткунбуз. 7-апрелди майрамдашка али эрте. Анткени биз кайгынын, кургай элек кандын үстүндө отурабыз. Себеби аларды аткандар соттоло элек. Өкмөттүн иштегенине 2-3 ай болду, иштесин, үмүт үзө элекпиз. Албетте, өкүнүчтүү, кечээ күнкү эле аткаминерлер кайра келип, борттон сыртта калган адам катары бизге деле оор тийип жатат. 
-Азимбек мырза, азыркы коалиция жөнүндө эмне айта аласыз?
- Коалицияга оюм тескери. Өкмөттө бирдиктүү саясат жок, бир нерсе десе “кана, кол койбодуң беле, Алмазбек Шаршенович, биздин адамды бийликке кой” дейт. Ал адамы болсо аларга гана отчёт берип, Атамбаевди укпайт. Ырас, үч партия коалициялык өкмөт курдубу, мүмкүнчүлүк берели. Эгер иштей албаса, коалицияны таратып, алардын ордуна башка өкмөт түзүп коюуга болот.
– “Жубайым “биз качан элге окшоп жашайбыз?” деп капаланат” дедиңиз эле, эми кантип жатасыздар?
– Швейцарияда качып жүр­гөн экинчи уулум балалуу болгон, тамашалап Качкынбек деп койдум. Эне да, кээде ошолорду эстеп сагынат, кейийт. Ошол уулум апасынан “атам баягыдай эле Чапай болуп жүрөбү, көчөдө революция кылып?” деп сурайт экен. Ооба, үйүбүздө ушундай сөздөр чыгат, бирок бири-бирибизге түшүнүү менен мамиле кылабыз.
– Сырттан караган адамга абдан сүрдүү көрүнөсүз, мүнөзүңүз кандай?
– Ороймун, өзүмдүкүн бербейм, бетке чабармын, ошондуктан көп адамдарга жакпайм.
– Көп учурда оппозициячылардын өмүрү кыл учунда. Ошондой кайгылуу күндөн кеп салып берсеңиз?
– Үзөңгү-Кууштун айынан түрмөдө жатканда ойлогом, “өлүп калат турбаймынбы” деп. Бул сыяктуу коркунучтуу күндөр, ыйлай турган капалуу убактар өткөн.
– Азимбек Анаркулович, аман­дыкта көрүшөлү дейли да, жыйынтык сөзүңүздү угалы.
– Чоң рахмат, түз байланышка чыгып, тартынбай жүрөк өйүткөн суроолорду бергениңиздер үчүн. Кыргызстанды жалаа, ушак-айың каптады. Ошолор менен убара болуп жүрүп өзүбүздүн руханий дүйнөбүзгө шек келтирип албайлы. Кыргыз эли эки революцияны баштан өткөрдү, эми бизге үчүнчү революция керек. Бул жан дүйнөбүздү тазалоо революциясы. Ар бирибиз өзүбүздүн ички туюмубузду тазалап, түзөлсөк, коом да оңолот.

Бурул Исмаилова
politika@super.kg