“Кыргыз өлкөсүнүн сулуу айымы-2015” сынагында баш байгени 25 жаштагы Таңсулуу Өмүрзакова жеңип алды

Бүгүн, 29-мартта Бишкектеги тойканалардын биринде “Кыргыз өлкөсүнүн сулуу айымы-2015” сынагы өткөрүлдү. Ага 24 жаштан 52 жашка чейинки 30 айым катышты.

Сынактын жүрүшүндө ажарлуу айымдар өзүн тааныштыруу, дизайнерлик, улуттук жана кече кийимдерин кийип көрктүү басуу тапшырмалары боюнча ат салышты.

Катышуучулардын сулуулугун жана өнөрлөрүн КРнын Эмгек сиңирген артисти Темирлан Сманбеков, режиссёр Эрнест Абдыжапаров, актёр Азиз Мурадиллаев, ырчы Анжелика Бекболиева, дизайнер Замира Молдошева, “Супер-Инфо” гезитинин шеф-редактору Сүйүн Кулматова, “Кыргыз өлкөсүнүн сулуу айымы-2014” сынагынын жеӊүүчүсү Наргиза Осмонова жана сулуулук жаатында иш алып барышкан инсандар электен өткөрүштү.

Жыйынтыгында баш байге - “Кыргыз өлкөсүнүн сулуу айымы-2015” наамы Таңсулуу Өмүрзаковага ыйгарылды. Таажыны “Кыргыз өлкөсүнүн сулуу айымы-2014” сынагынын жеңүүчүсү Наргиза Осмонова кийгизди. Ошондой эле ага Беларуста өтө турган "Дүйнөнүн сулуу айымы" сынагына жолдомо тапшырылды.

Ал эми "Кыргыз өлкөсүнүн 1-вице сулуу айымы" наамы Мария Вавиловага, "Кыргыз өлкөсүнүн 2-вице сулуу айымы" наамы Аида Исатбек кызына, "Кыргыз өлкөсүнүн 3-вице сулуу айымы" наамы Лариса Цайга буюрду.

“25 жаштамын, жолдошум, 7 жаштагы кызым бар. Сынакта жеңишке жетем деп күткөн эмесмин. Эми мага ишенип тапшырылган жолдомо менен өлкөбүздүн намысын коргоп келем”,- деди толкунданган Таңсулуу Өмүрзакова.