Малайзиялык коноктор Ысык-Көлдө жөнөкөй кыргыз тиричилиги менен таанышышты (фото)

Малайзиядан келген журналисттер 28-июлда Ысык-Көлдө кыргыз тиричилиги менен таанышышты. Көл жээгиндеги конок үйлөрдүн биринин ээси меймандарды жылуу маанайда тосуп алып, накта меймандостук сапатын көрсөттү. Шыпылдап кызмат кылып, үйүндөгү өзгөчөлүктөр менен туристтерди тааныштырып чыкты. Журналисттер бул жерден стол теннисин ойношуп, кыргыз даамдарынын башка түрлөрүнөн ооз тийишти. Малайзиялык журналисттер пансионаттын тамактарына салыштырмалуу жөнөкөй кафелердин тамак-ашы даамдуураак экенин белгилешти. 

Айта кетсек, 24-июлда Кыргыз Республикасынын Малайзиядагы элчилигинин чакыруусу менен өлкөгө “The Star”, “TV3 Malaysia”, “Bernama” аттуу 3 ири малайзиялык медиамекеменин журналисттери келишкен. Алар: кабарчы Ох Чин Энг (“The Star”), фотограф Онг Сун Хин (“The Star”), кабарчы Азария Тагайа (“TV3 Malaysia”), оператор Ахмад Азизи бин Аднан (“TV3 Malaysia”), кабарчы Суриати Сануси (“Bernama”) жана оператор Хайрул Икхван бин Жаафар (“Bernama”).

Иш-чаранын максаты - Кыргыз Республикасын эл аралык аренада даңазалоо.