ЭЛДИК КАБАР: KGFH 1265 номурлуу унаа такси кызматына пайдаланылып жатат

Бишкекте мамлекеттик номуру KGFH 1265 болгон унаа такси кызматына пайдаланылып жатат. Бул тууралуу 9-ноябрда SUPER.KG порталына WhatsApp аркылуу байланышкан окурман билдирди. "Менин билишимче, KG номурлар мамлекеттик органдардагы кызматтык унааларга гана берилчү. Мамлекеттик органдарга, кызматтык унааларга берилүүчү номурду, кызматтык унааны такси кызматына пайдаланууга болобу?"- дейт ал.

Бул боюнча Мамлекеттик каттоо кызматынын басма сөз кызматы төмөнкүлөрдү билдирди:

"Кыргыз Республикасынын Өкмөтүнүн 2003-жылдын 15-февралындагы №65-токтому менен бекитилген aвтомототранспорт каражаттарын жана алардын чиркегичтерин Кыргыз Республикасынын Өкмөтүнө караштуу Мамлекеттик каттоо кызматында каттоо эрежелеринин 26-пунктуна ылайык, фону сары болгон "Н" сериясындагы мамлекеттик номер белгилери төмөнкү учурларда берилет:

- биргелешкен кыргызстандык-чет өлкөлүк ишканалардын чет өлкөлүк жарандар же бул ишканалардын чет өлкөлүк кызматкерлери башкарган транспорт каражаттарына;

- чет өлкөлүк жарандарга прокатка берилген транспорт каражаттарына;

- чет өлкөдө туруктуу жашаган жана республикага жеке иштери боюнча келген чет өлкөлөрдүн жарандарынын транспорт каражаттарына;

- дипломатиялык өкүлчүлүктөргө, дипломатиялык кызматкерлерге жана алардын үй-бүлө мүчөлөрүнө;

- чет өлкөлүк жарандарга жана жарандыгы жок адамдарга таандык болгон автомобиль чиркегичтерине;

- жашоого уруксат боюнча республикада туруктуу жашап жаткан чет өлкөлүк жарандардын транспорт каражаттарына берилет.

"Н" сериясындагы номер белгилерин берүү үчүн негиз болуп транспорт каражаттарынын ээлеринин арызы саналат.

Ал эми бул автоунааны автомототранспорт ээлери кайсы чөйрөдө пайдалана турганына чектөө коюлган эмес. Ошондой эле мындай номер берилген автоунааны такси кызматында пайдалануу боюнча суроо биздин кызматтын компетенциясына кирбейт".