Дин эксперти Кадыр Маликовду катуу сабап, бычактаган адамдарга эл аралык издөө жарыяланды (фото)

Бишкектин Асанбай кичи району тарабында дин эксперти, коомдук ишмер Кадыр Маликовго кол салуу фактысы боюнча тергөө амалдары уланууда. Бул тууралуу бүгүн, 28-ноябрда ИИМдин басма сөз кызматы жарыялады.

Маалыматка ылайык, 26-ноябрда саат 18:50дө К.Маликов Асанбайдагы ата-энесинин үйүнөн чыгып, жолугушууга бараткан. "Народный" дүкөнүнүн унаа токтотуучу аянтчасында анын Лексус-470 үлгүсүндө автоунаасынын жолун БМВ үлгүсүндөгү автоунаа тосуп турганын байкаган. БМВнын салонунда азиат улутундагы 25-30 жаштардагы жаран отурган. Маликов ага кайрылып, унааны жылдырып коюуну өтүнгөн. Жаран дүкөнгө кирип кеткен айдоочунун келишин күтүп турууну суранган. Буга К.Маликов макул болуп, андан соң "Народныйга" уюлдук телефонунун балансын толтурууга кеткен. Ал унаасына кайра келгенде аталган айдоочуну көрүп, бирок БМВ ордунан жылбаганын көргөн. Мындан кийин алардын ортосунда чыр чыгып, жыйынтыгында Маликов ооруканага жеткирилген.

Ушул эле күнү Бишкек шаарынын Октябрь райондук ички иштер башкармалыгы аталган факт боюнча "бейбаштык" беренесинин негизинде кылмыш ишин козгогон. Тергөө амалдарынын жүрүшүндө БМВ үлгүсүндөгү унаа Алтын-Ордо конушунан табылган. Унааны текшерүүдө манжалардын издери алынып, керектүү буюмдар экспертизага жөнөтүлгөн. Андан соң БМВ унаасы Октябрь РИИБине жеткирилген.

26-ноябрдан 27-ноябрга караган түнү кылмышка шектүүлөрдүн өздүгү аныкталган, алар: Нарын шаарында 1987-жылы туулган, Бишкек шаарынын Кара-Жыгач конушунда жашаган Тилек уулу Алибек жана Ош облусунун Ноокат районунда 1986-жылы туулган, үй-бүлөсү менен Бишкектин Асанбай кичи районунун №28-үйүнүн №2-батиринде жашаган Ырыскул Бейшеналиев.

27-ноябрда тергөөчүлөр жабырлануучу К.Маликовго барышып, окуя боюнча маалымат алышкан. Мындан тышкары милиция кызматкерлери Маликовго кылмышка шектүүлөрдүн сүрөттөрүн көрсөткөндө, ал сүрөттөгү адамдар ага кол салгандар экенин билдирген.

27-ноябрда Октябрь РИИБи кошумча материалдар менен таанышып, козголгон кылмыш ишинин "бейбаштык" беренесин "мамлекеттик же коомдук ишмерге кол салуу" беренесине өзгөрткөн. Учурда ыкчам иликтөө амалдары жүргүзүлүп, кылмышка шектүүлөрдү кармоо боюнча иш-чаралар өткөрүлүүдө. 28-ноябрда аларга эл аралык издөө жарыяланды. Тергөө амалдары уланууда.