Жогорку Сот айыпталуучу Канжар Кадыралиевди үй камагында калтырууну чечти

Жогорку Сот бүгүн, 27-январда айыпталуучу Канжар Кадыралиевди үй камагында кармоо боюнча райондук соттун чечимин күчүндө калтырды. Маалыматты SUPER.KG порталына айыпталуучунун жактоочусу Икрамидин Айткулов тастыктады. Буга чейин райондук соттун чечимин Бишкек шаардык соту да күчүндө калтырган.

Эске салсак, Башкы прокуратура 2014-жылдын 30-сентябрында, 14-ноябрында жана 5-декабрында Канжар Кадыралиевге карата “бейбаштык”, “өзүм билемдик” жана “зомбулук көрсөтүү менен талап кылуу” беренелери боюнча кылмыш ишин козгоп, ээлеген кызматынан бошоткон.

Андан соң Ош шаардык соту аны камакка алуу чечимин чыгарып, издөө жарыялаган. 2015-жылдын 26-мартында Кадыралиев Башкы прокуратурага өз эрки менен келген, андан кийин ден соолугуна байланыштуу ооруканага жаткырылганы жарыяланган.