7 жашар Даниэлдин өлүмүнө шектүү аял күнөөлүү деп табылып, 25 жылга эркинен ажыратылды

Бүгүн, 1-апрелде Бишкектин Биринчи Май райондук сотунда 1-класстын окуучусу Даниэлдин өлтүрүлүшү боюнча соттук кароодо судья айыпталуучу Майрам Акуновага тагылган айыптар толугу менен далилденгенин айтып, ал күнөөсүн мойнуна албаганына карабастан күнөөлүү деп тапты. Жыйынтыгында судья анын мүлкүн конфискациялоо менен 25 жылга эркинен ажыратуу боюнча өкүм чыгарды.

Судьянын айтымында, Акунованын СИЗОдо өткөргөн ар бир күнү эки күн катары эсептелинип, жаза мөөнөтүн №1-СИЗОдо аткармакчы. "Ал эми жабырлануучу тарап А.Макелеевага моралдык жана материалдык чыгымдарына 500 миң сом өндүрүлсүн" деген өкүм чыгарды.

Айта кетсек, мындан бир нече убакыт мурун айыпталуучуга акыркы сөз берилген учурда ал өзүн өлтүрүүгө аракет кылып, курсагын кескилеп салган. Залда ызы-чуу башталып, курсагы канжалаган айыпталуучуну залдан чыгарып кетишкен.

Өткөн соттук отурумда прокурор айыпталуучунун күнөөсү толугу менен далилденгенин баса белгилеп, аны 25 жылга эркинен ажыратууну өтүнгөн. Ал эми жабырлануучу А.Макелеева бул чечимге макул болбой айыпталуучуну өмүр бою эркинен ажыратууну суранган.

Эске салсак, 2015-жылдын 10-декабрында милицияга 33 жаштагы Астра аттуу жаран кайрылып, анын баласын белгисиз адамдар уурдап, кайтарып берүү үчүн 150 миң сом талап кылып жатышканын айткан. 11-декабрда аталган кылмышка шектүү катары 39 жаштагы Майрам Акунова аттуу аял кармалган. Анын Жалал-Абад облусунда туулганы, буга чейин уурдоо жана алдамчылык боюнча соттолгону белгилүү болгон. Суракта Майрам Акунова акыркы 10 күн ичинде уурдалган баланын үй-бүлөсү жөнүндө маалыматтарды топтоп жүргөнүн айткан. Тиешелүү экспертизанын жыйынтыгына ылайык, анын акыл-эси жайында экени, ал эми бала дарыдан эмес, муунтулуп өлтүрүлгөнү аныкталган.