Стамбулда "Кытайдын 98 жаранына жасалма паспорт саткан" деген шек менен кармалган кыргыз жарандары 107 паспорт жасашкандыгы аныкталды

Стамбулда "Кытайдын 98 жаранына жасалма паспорт саткан" деген шек менен кармалган кыргыз жарандары 107 паспорт жасашкандыгы аныкталды. Бул тууралуу бүгүн, 24-майда SUPER.KG порталына УКМКнын басма сөз кызматынын жетекчиси Рахат Сулайманов билдирди.

"Жасалма паспорт сатып кармалгандардын бири мурда да ушул берене менен сот жообуна тартылган Ахмадилла Сайдуллаев экени такталды. Аталган топ жалпы 107 жасалма паспорт даярдаганы аныкталды. Үстүбүздөгү жылдын 30-апрель күнү Ош шаарынын аэропортунан Стамбул каттамы менен уча турган жарандын жанынан 9 жасалма паспорт табылган. Буга Сайдуллаевдин тиешеси бар экени далилденген. Ал эми калган 98 жасалма паспорт менен Кытайдын жарандары Стамбулдан кармалышты. Учурда кылмышка шектүү катары кармалган 4 кыргыз жараны, алардын бири Сайдуллаев Стамбулда камакта. Бул факт боюнча кылмыш иши козголуп, тергөө амалдары жүрүүдө. Алар качан өлкөгө алынып келинери азырынча белгисиз", - дейт Сулайманов.

Эскерте кетсек, Стамбул шаарынан Сауд Арабиясына учууга аракет кылган 98 кытайлык жаран жасалма кыргыз паспорту менен кармалган.