Тонолгон орусиялык турист: "Быйылкы жайкы эс алуу мындай окуялар менен коштолот деп күткөн эмесмин"

Бүгүн, 9-июль күнү Чүй облустук ички иштер башкы башкармалыгынын Ардагерлер кеңеши тонолгон орусиялык турист Дмитрийге акчалай жардам берди. Ардагерлер кеңешинин төрагасы Кантемир Турдалиев: "Балаңызды атайын Ысык-Көлгө алып келе жатканыңызды угуп, биз дагы акчалай жардам берүүнү туура көрдүк. Эми эч нерседен кооптонбой эс алууга келип туруңуздар. Кыргыз милициясы дайым ыкчам иш алып барууга даяр", - деди.

Ошол эле учурда орусиялык турист Дмитрий Ребров милиция кызматкерлерине ыраазычылык билдирди.

Ал өз сөзүндө: “Быйылкы эс алуу мындай окуялар менен коштолот деп күткөн эмесмин. Кечээ өкмөттүн Ысык-Көл облусундагы өкүлү менен жолуктум эле, бүгүн мына сиздер менен жолугуп отурам. Өзүмдүн жана үй-бүлөмдүн атынан сиздерге терең ыраазычылык билдирем”, - деди.

Эске салсак, 4-июль күнү Токмок шаарына жакын жердеги айланып өтүүчү жолдон Ысык-Көлгө бара жатышкан Орусиянын Дмитрий жана Ирина аттуу эки жаранын өздөрүн “милиция кызматкерибиз” деп тааныштырган белгисиз адамдар тоноп кетишкен. Орусиялык жарандар ден соолугунун мүмкүнчүлүгү чектелген баласын Ысык-Көлгө дарыланууга алып бараткандары белгилүү болгон жана 100 евро, 20 миң рубль, 45 миң сом акчасын алдыртып жиберишкен. Бул кылмышка шектүү катары Аламүдүн районунун 1974-жылы туулган Т.М. аттуу тургуну жана 1969-жылы туулган К.К. аттуу шаар тургуну кармалган. Алардын милициянын мурунку кызматкерлери экени жана ушул сыяктуу кылмыштары үчүн жумуштан кетирилгени аныкталган.