Оштун вице-мэри Асылбек Топчубаев: "Жылуулук системдерин оңдоо боюнча 1 миллион 937 961 сомдук иш аткарылды"

Ош шаарындагы "Жылуулук камсыздоо" ишканасында 74 откана жылуулук берүүгө даяр. Мындай маалыматты бүгүн, 21-октябрда Ош шаардык мэриясынын коллегиялык жыйынында вице-мэр Асылбек Топчубаев айтты.

Маалыматка ылайык, калкты жылуулук менен камсыздоо үчүн даярдалган от казандарынын ичинен 17 откана электр энергиясы менен жылыйт. Ал эми 57 отканада көмүр колдонулат.

"Ош шаарында 2016-жылга таптакыр жылуулук системи жок 10 көп кабаттуу үй жылуулук менен камсыздалды. Бул үчүн 1 миллион 937 961 сомдук жумуш аткарылды. Анын ичинен 50 пайызы жергиликтүү бюджеттен каржыланган. Андан сырткары 8 көп кабаттуу үйдүн суу, канализация түтүктөрүн оңдоо иштери жүргүзүлдү. Адистердин жардамы менен турак үйлөр, мекеме-ишканалардын жылуулук системдери текшерүүдөн өттү. Бүгүнкү күндө калкка жылуулук берүү, кышка карата даярдык толугу менен аткарылды", - деп билдирди Топчубаев.

Белгилүү болгондой, элге көмүр даярдоо боюнча Ош шаарында 15 көмүр сатуу пункту уюштурулган.