Таласта "13 жаштагы кызды зордуктады" деп айыпталган жарандын иши боюнча соттук отурум жылдырылды

Талас облусунун Бакай-Ата районунда "13 жаштагы кызды зордуктады" деп айыпталган иш боюнча соттук отурум 17-жолу жылдырылды. Бул тууралуу бүгүн, 21-декабрда SUPER.KG порталына жабырлануучунун эжеси Рахима Айкымбаева билдирди.

"13 жаштагы сиңдимди зордуктаган деп айыпталган адам атамдын агасынын баласы. Бул иш боюнча соттордон акыйкаттык таппай келебиз. Буга чейин бир канча жолу соттук отурум ар кандай шылтоолор менен жылдырылып келген. Күбөлөр жетишсиз деп да бир нече жолу отурумдар өтпөй калды. Ал эми зордуктады деп кармалган Эрлан Дөлөновдун туугандары "тосмо арыз жазып бер" деп 14 миң АКШ долларын сунушташкан", - деп билдирди Айкымбаева.

Рахима Айкымбаеванын маалыматына ылайык, "13 жаштагы кызды зордуктады" деп айыпталган иш боюнча соттук отурум акыркы жолу 19-декабрда "Талас облусунун соту ооруп калды" деген жүйө менен өтпөй калган. Кийинки соттук отурум 2017-жылдын январь айына белгиленген. Учурда зордуктоого байланышкан ишти Талас облустук соту кароодо.

Эске салсак, "окуучу кызды зордуктады" деп айыпталып кармалган 33 жаштагы тууганы Эрлан Дөлөнов үй камагына чыгарылган.