Орусияда кыргыздын террорчулар катарында согушканын билип, укук коргоо органдарына айтпай койгон жаранга 70 миң рубль айып салынды

Орусиянын Астрахань облусундагы Киров райондук соту Орусияда алгачкы жолу 205-беренесинин 6-пунктуна (кылмыш тууралуу билдирбей коюу) ылайык өкүм чыгарды. Бул тууралуу орусиялык ЖМКлар жазышууда.

Маалыматтарга ылайык, Астрахандын тургуну Улукбек Гафуров бул берене боюнча күнөөлүү деп табылып, ага 70 миң рубль айып салынган. Тергөөнүн жыйынтыгында Гафуров анын таанышы, Кыргыз жараны Равшан Акбаров согушкерлер лагеринде даярдыктан өтүп, кийинчерээк террорчулар тарабында согушканын билип, укук коргоо органдарына айтпай койгону аныкталган.

Ал эми Акбаров өткөн жылы декабрь айында 8 жылга кесилгени маалым болду.

Бул берене Орусиянын Кылмыш-жаза кодексине өткөн жылы киргизилген. Анын негизинде күнөөлүү деп табылгандарга 100 миң рублга чейин айып салынары, бир жылга чейин мажбурлап иштетүү же ошол эле мөөнөткө эркинен ажыратуу каралган.