Бишкекте дайынсыз делген Аселя Төрөбекова Чоң Чүй каналынан изделүүдө

Бишкекте мектепке кеткен боюнча дайынсыз делген 10 жаштагы Аселя Төрөбекованы издөө иштери уланууда. Бул тууралуу бүгүн, 6-апрелде Бишкек шаардык ички иштер башкы башкармалыгынан билдиришти.

"Издөө иштери бүгүн да уланат. Анын сумкасын Чоң Чүй каналынын жээгинен көргөндөр бар экен. Мындан улам издөө иштерине суучулдар да тартылды", - деп билдиришти Бишкек ШИИББинен.

Айта кетсек, 2006-жылы туулган Аселя Төрөбекова 3-апрель күнү саат 12:15 чамасында мектепке үйүнөн чыгып кеткен боюнча кайтып келген эмес. Азыркы убакта анын кайда жүргөнү белгисиз. Бою 130-140 сантиметр, арыкчырай, көздөрү кара, чачы кара түстө. Ошол күнү үстүнө кызгылт түстөгү куртка жана мектеп формасын кийип жүргөн. Көргөн-билгендер болсо, төмөнкү телефон номурларга чалып, кабарлап койсоңуздар. 0550 102 872, 0772 180 945.