Казакстандын мусулмандар биримдиги сакалга салык салууну сунуштады

Казакстандын мусулмандар биримдиги аттуу уюм сакал койгондорго салык салууну сунуштады. Бул тууралуу Казакстандын nur.kz басылмасы жазып чыкты.

Сунушту киргизип жаткан Уюмдун жетекчиси Мурат Телибеков Францияда, Англияда жана Орусияда бир кезде колдонулган тажрыйбаны эске алып, азыр казакстандык белгилүү экономисттер менен теологдор сакал өстүргөнгө салык салуунун жол-жобосун иштеп чыгышканын айтат. Казакстандын мусулмандар биримдиги уюму сунуштаган мыйзамда 12,4 сантиметр узундуктагы кара сакалга жылына 1530 доллар, 12,1 сантиметр узундуктагы сары сакалга 1214 доллар, 11,8 сантиметр узундуктагы боёлгон сакалга 1127 доллар салык салуу сунушталат.

Ошондой эле маалыматка ылайык, медицина жана теология тармагындагы адистер сакалдын узундугу 1 сантиметр 7 миллиметрден ашпаганы жакшы деген тыянакка келгени айтылат. Алардын пикиринде, бул адамдын ден соолугуна жакшы таасир этип, жаман ойлорго тоскоол болот. Долбоордо мындай талапка баш ийбегендерди жоопкерчиликке тартуу да каралып, бул мыйзамды мусулмандар эле эмес, өлкөдөгү башка бардык диндердин өкүлдөрү сактоого тийиш экени айтылат.