Орусияда мурдагы куткаруучу 4 адамды атып өлтүрдү

Орусия Өзгөчө кырдаалдар министрлигинде мурда куткаруучу болуп иштеген жаран 4 адамды атып өлтүрүп, андан соң өзү турган үйдү өрттөп качып кеткен. Бул тууралуу Орусиянын маалымат булактары жазат.

10-июндан 11-июнга караган түнү Подмосковьенин Кратово кыштагында 50 жаштагы киши мергенчиликте колдонгон мылтык менен 4 адамды атып, көчөдөгү башка адамдарга да ок чыгарып жаракат келтирген. Мындан тышкары кылмышкерди кармоо операциясында 4 атайын топтун кызматкери дагы жаракат алышкан. "Кылмышкерди 6 саат бою издеп жүрүп, аны токойдон таап, атайын ыкчам топтун кызматкерлери атып өлтүрүштү", - деп маалымдайт Орусиянын Ички иштер министрлиги.

Окуя болгон күнү Кратово айылынын жашоочусу өзү жашаган үйүнүн ичинен көчөдө жүргөн адамдарга ок чыгара баштаган. Окуя укук коргоо кызматкерлерине кабарланган соң аны кармоо үчүн келгендерге да ок аткан. Жергиликтүү маалымат каражаттары жазгандай, ок чыгарган жарандын аты Игорь Зенков жана ал Орусиянын ӨКМнын мурдагы кызматкери болгон. 4 адамды атып дагы башка адамдарга жаракат келтирген соң Зенков өзү жашаган үйгө өрт коюп, токой тилкесине качып кеткен. Издөө жана ликвидациялоо операциясы 5-6 саатка созулган. Тийиштүү кызмат кылмышкерге жакын жашаган айылдаштарын эвакуациялоого жетишкенче айрымдары жаракат алышкан. Ага өз атасы сүйлөшүүгө барганы менен майнап чыккан эмес. Окуянын аягы анын өлүмү менен аяктады.

Бул иш боюнча Орусиянын Тергөө комитети адам өлтүрүү, курал-жаракты мыйзамсыз сактоо жана колдонуу, милиция кызматкеринин өмүрүнө зыян келтирүү беренелери боюнча окуянын негизинде кылмыш ишин козгоду. ТАСС маалымат агенттиги билдиргендей, Игорь Зенков Чеченстандагы куралдуу жаңжалга катышып, психикалык жактан жабыркаганы белгилүү болду.