Жактоочу Арман Кыйгырова күнөөсүз эки жаран өмүр бою эркинен ажыратылып, абакта жатканын айтып чыкты

Жактоочу Арман Кыйгырова бүгүн, 21-июнь күнү Акыйкатчы институтунун сот адилеттигине байланышкан баяндамасын талкуулоо учурунда абакта айрым күнөөсүз кармалып жаткан жарандардын көйгөйүн ортого салды. Кыйгырова өзү жактоочулук кылган үч жарандын соттук иштерине токтолуп, алар күнөөсүз кармалып жатканын белгиледи.

"Айбек Эрнист уулу аттуу жаран зордуктоо фактысы боюнча кармалып, эки жылдан бери абакта. Алгач №3-колонияда жаткан, жакында №1-СИЗОго которуп жиберишти. Бирок ал күнөөлүү экенин көрсөткөн бир дагы далил жок. Тийиштүү делинген бардык предметтерди экспертизадан өткөрүп, эч нерсе таба алышкан жок, арыздын негизинде гана кармап жатышат. Соттук иш жабык болуп, баш аламан өтүп жатат.

Дагы эки жаран Кара-Балта шаарында жашы жете элек кызды зордуктап, өлтүрүшкөн деген айып менен өмүр бою эркинен ажыратылып 2008-жылдан бери абакта. Эч кандай далили жок камалышты. Болгону бир койчунун жана бир жаш баланын көрсөтмөсү бар. Койчу балдардын бирин кылмыш болгон жерге жакын жерден көргөм деп көрсөтмө берген. Бирок кандай кылып өлтүргөнүн, зордуктаганын көргөн эмес. Камакта жаткандын дагы бири ошол учурда кафеде отурган. Аны менен бирге кафеде отурган 14 адам ал бала кылмыш болгон учурда кафеде болгонун далилдеп беришкен. Ошого карабай эркинен ажыратылышты. Буга Акыйкатчы институту көңүл бурушу керек", - деди жактоочу.