Бишкекте Кулиев-Рыскулов көчөлөрүнүн кесилишинде эки жеңил унаа кагылышты

Бүгүн, 4-июлда Бишкекте Кулиев-Рыскулов көчөлөрүнүн кесилишинде Фольксваген пассат жана Хонда Эдикс үлгүсүндөгү эки жеңил унаа кагылышты. Жол кырсыгынан эки унаа тең жараксыз абалга кептелген. Айдоочулар жабыркаган эмес.

"Жол чырактын сарысы өчүп-күйүп турганда каршы тилкеде келе жаткан унааларды өткөрүп жиберип сол тарапка бурулуп жаткам. Унаалардын баары өтүп бүткөн болчу. Бир убакта катуу ылдамдык менен келген унаа сүзүп кетти. Бактыга жараша, бетме-бет сүзүшкөн жокпуз. Унаамдын фаралары талкаланып, дөңгөлөк айрылып кетиптир. Ал эми мени сүзгөн унаа анчалык көп жабыркаган эмес. Азыр Патрулдук милиция кызматкерлерин күтүп жатабыз. Ким күнөөлүү, ким эрежени бузду аныктап беришет. Ага чейин айдоочулар бир чечимге келе албай турабыз", - деп билдирди Хонда Эдикс унаасынын айдоочусу.