Маркум Дүйшөбаева менен Калыбек Элтуйбасов алгачкы жолу эмне максатта жолугушканын жактоочусу айтып берди

Маркум Камила Дүйшөбаева менен Калыбек Элтуйбасов алгач кандай максатта жана качан жолугушканы белгилүү болду. Элтуйбасовдун жактоочусу Улан Жумаковдун айтымында, алар 2013-жылы жолугушкан. "Элтуйбасов менен Дүйшөбаева биринчи жолу 2013-жылы жолуккан. Менин билишимче, кыз андан жумуш сураган. Андан кийин 2014-жылдын 10-мартында жолугушкан. Камила ага телефон чалып акча сураган, ал акчаны алып келип берген. Андан кийин жолугушкан эмес", - деди жактоочусу. Анын айтымында, Камила Дүйшөбаева Элтуйбасов менен жолуккан соң өз үйүнө барып түнөгөн.

Эскерте кетсек, кечээ, 3-июлда маалым болгондой, Камила Дүйшөбаеванын өлүмү боюнча ишти иликтөөгө тоскоолдук жараткан деген айып менен Калыбек Элтуйбасовду камакка алуу чечими чыккан. ИИМдин маалыматына караганда, Элтуйбасов өлкө аймагынан чыгып кеткен. Ошол себептен ага издөө жарыяланган болчу.

Маалымат үчүн: Белгилүү болгондой, 2014-жылдын 10-мартында 19 жаштагы студент Камила Дүйшөбаева Бишкек шаарынын Достук кичи районундагы үйүнөн эртең менен чыгып, ошол боюнча кайрылып келген эмес. Туура бир жумадан соң 17-мартта анын сөөгү Байтик айылынын чекесинен табылган. К.Дүйшөбаеванын өлүмү боюнча Кылмыш-жаза кодексинин "адам өлтүрүү" беренесинин негизинде кылмыш иши козголуп, 1500дөй киши суракка алынган. Ал эми Салянованын агасы кыз каза болгонго чейин аны менен телефон аркылуу сүйлөшкөнү айтылып келет.