Кара-Суу райондук соту милиция кызматкери Толкунбек Шоноевдин өлүмүнө шектелген Кадырбек Досоновду актады

Кечээ, 6-июль күнү Ош облусунун Кара-Суу райондук соту милициянын полковниги Толкунбек Шоноевдин өлүмүнө шектелген Женго каймана аты менен белгилүү Кадырбек Досоновдун ишин карады. Анда райондук сот Досоновду актаган.

Кадырбек Досонов Кылмыш-жаза кодексинин 231-беренеси (кылмыштуу топту уюштуруу), 30-241-беренеси (курал-жарак жана жардыруучу заттарды мыйзамсыз алып жүрүү), 30-97-беренеси (уюшуп алып, кызматтык милдетин аткарып жаткан адамды мыкаачылык менен өлтүрүү) жана 30-340-беренеси (уюшуп алып укук коргоо органынын кызматкерин өлтүрүү) менен айыпталып жаткан.

Ал 2015-жылдын 16-апрелинде кармалган.

Айта кетсек, 2013-жылдын 11-январында милиция кызматкери Т.Шоноевди белгисиз адамдар үйүнө келе жатканда атып кетишкен.

Буга чейин "Шоноевдин өлүмүнө катышкан" деген айып тагылып, К.Сайдиев, А.Аскарбек уулу жана Т.Жапарбаев өмүр бою эркинен ажыратылган. Ошондой эле У.Молдошев 20 жылга, ал эми С.Айтбай уулу, Н.Таджибаев жана Э.Эсенов 10 жылга кесилишкен.