Өзбекстанда дааратканага түшүп кеткен телефонду алууга аракеттенген 3 адам каза болду

Өзбекстандын Наманган облусунда 3 адам даараткананын жытына ууланып каза болду. Бул тууралуу бүгүн, 17-июлда өзбек басылмалары жазып чыгышты.

Өзбекстандын Өзгөчө кырдаалдар министрлиги маалымдагандай, Наманган облусунун тургуну уюлдук телефонун дааратканага түшүрүп алып, аны алып чыгуу үчүн 2 адамды жалдаган. Алар дааратканага түшүп андагы сасык жытка ууланышып, кайра сыртка чыга алышкан эмес. Үйдүн тургуну аларга көмөктөшүү иретинде дарыгер чакырган. Тилекке каршы, дарыгер да дааратканадагы адамдарды чыгаруу үчүн чуңкурга түшүп, кайра чыга албай калган.

“Жыйынтыгында дааратканага түшкөн 2 адам ошол жерден каза болгон. Ал эми дарыгер ооруканага бара жаткан жолдо көз жумган. Белгилүү болгондой, өлүмдүн себеби дем алуучу абада фекаль газы аралашкандыктан кычкылтек жетишсиз болгон”, - дейт ӨКМ.

Ошондой эле учурда бул тууралуу териштирүү иштери жүрүп жатканын кошумчалаган.