Техаста жүк ташуучу унаанын ичинен 8 мигранттын жансыз денеси табылды

Американын Техас штатында жүк ташуучу унаадан 8 мигранттын жансыз денеси табылды. Окуя АКШ убактысы боюнча 23-июлга караган түнү саат 00:30да катталган. Анда аталган штаттагы дүкөндөрдүн биринин алдына жүк ташуучу унаа келип токтогон. Андагы белгисиз жаран дүкөндө иштеген кызматкерден суу алып чыгып берүүсүн өтүнгөн. Унаанын ичиндегилер шектүү көрүнгөндүктөн кызматкер суу алып чыгып берген соң жергиликтүү укук коргоо органдарына кабарлаган. Бул тууралуу полиция кызматкерлеринин бири Уильям Макманус жалпыга маалымдоо кызматтарына айтып берген.

“Биз келип жүк ташуучу унааны карап, 8 адамдын жансыз денесин таптык. Мындан сырткары унаада дагы 28 мигрант болгон. Алар катуу жаракат алышкандыктан, дароо ооруканага жеткирилген. Учурда алардын 8инин абалы оор”, - деген ал.

Азырынча окуянын себеби тактала элек. Алдын ала маалыматтарга ылайык, унаадагылар Мексикадан качып келе жаткан мигранттар болгон.