Өмүрбек Текебаев мамлекеттик жактоочудан баш тартты

Бүгүн, 26-июлда Өмүрбек Текебаевдин жана мурдагы элчи Дүйшөнкул Чотоновдун иши боюнча соттук отурум уланды. Текебаевдин жактоочусу Канат Хасанов жүрөк оорусу козголуп, ооруканага түшкөнүн билдирген маалыматты сотко жиберген. Андан сырткары ал ден соолугуна байланыштуу отурумду башка күнгө жылдыруу өтүнүчүн келтирген.

Мамлекеттик айыптоочулар, Текебаевдин үч жактоочусу тең дарыланып жатканын айтышып, алардын ордуна мамлекеттик жактоочуларды киргизип, ишти кароону сурашты. Сот Текебаевди мамлекеттик жактоочу менен камсыз кылуу өтүнүчүн канааттандырды.

Бирок айыпталып жаткан Текебаев башка жактоочу табарын айтып, мамлекеттик жактоочудан баш тартты.

“Мен бул жактоочудан баш тартам. Мен өзүм башка жактоочу табам. Сиз азыр менин пикиримди сураган жоксуз”, - деди Текебаев.

Сот жактоочу табуу же андан баш тартуу Текебаевдин укугу экенин айтып, отурум эртең, 27-июлда уланарын айтты.