Текебаевдин сотунда Абдрахманов менен Модиндин беттешкен видеосу көрсөтүлүп, көрсөтмөлөрдө дал келбестик чыкты

Бүгүн, 2-августта Жогорку Кеңештин “Ата Мекен” фракциясынын лидери Өмүрбек Текебаевдин жана мурдагы элчи Дүйшөнкул Чотоновдун үстүнөн козголгон кылмыш иши боюнча соттук отурум уланды.

Сотто мурдагы депутат Өмүрбек Абдрахманов менен орусиялык жаран Алексей Модиндин беттештирилгени тартылган тасма көрсөтүлдү. Абдрахманов видеодо Модинди көрүп тааныганын жана бул адамды 2010-жылы 21-декабрда Текебаевдин иш бөлмөсүнөн көргөнүн тасмада айтып берди. Абдрахманов бул жолугушууга "Мегаком" боюнча түзүлгөн депутаттык комиссиянын төрагасы катары катышканын айтат.

Ал эми айыпталып жаткан Текебаев тасма көрсөтүлүп бүткөндөн кийин "Мегаком" боюнча депутаттык комиссия 2010-жылдын 29-декабрында түзүлгөнүн айтып Абдрахмановдун ушул көрсөтмөсүн эске алуусун сурады.