Ысык-Көлдө "баласынын көзүнчө келинди зордуктады" деп айыпталган жаран 8 жылга эркинен ажыратылды

Ысык-Көлдө "баласынын көзүнчө келинди зордуктады" деп айыпталган жаран 8 жылга эркинен ажыратылды. Бул тууралуу бүгүн, 16-августта SUPER.KG порталына Ысык-Көл райондук сотунан билдиришти.

Маалыматка ылайык, сот отуруму кечээ, 15-августта болуп Ысык-Көл райондук соту айыпталуучуну 8 жылга эркинен ажыраткан. Андан сырткары жабырлануучуга моралдык чыгым катары 100 миң сом, материалдык чыгым катары 30 миң сом төлөөсүн милдеттендирген.

Айта кетсек, 2016-жылдын 28-июль күнү 1983-жылы туулган Чүй облусунун тургуну милиция кызматкерлерине кайрылып, Балыкчы шаарынан Бишкекке келе жатканда айдоочу аны зордуктап, 5 жаштагы баласы менен талаага таштап кеткенин айткан. Бул иш боюнча кылмышка шектүү катары 1986-жылы туулган Балыкчы шаарынын тургуну кармалган. Ысык-Көл облусунун Тоң райондук соту зордуктоого шектелген жаранды 3 жылга эркинен ажыраткан. Буга макул болбогон прокуратура Ысык-Көл облустук сотуна кассациялык даттануу келтирген. Аталган иш боюнча Ысык-Көл облустук соту Тоң райондук сотунун өкүмүн жокко чыгарып, кайра кароо үчүн Ысык-Көл райондук сотуна жөнөткөн.