Бокс боюнча Дүйнө чемпиону Орзубек Назаровдун кызы жол кырсыгына кабылып, оор абалда

Бокс боюнча Дүйнө чемпиону Орзубек Назаровдун кызы жол кырсыгына кабылып, оор абалда. Бул тууралуу спортчу өзү социалдык тармактардагы баракчасынын бирине жазган.

"Достор, жардамга! Менин Аделинам комада. Кан керек. Кандын бардык тобу жарай берет. Канды Чыңгыз Айтматов жана Айни көчөлөрүнүн кесилишиндеги Кан берүү борборуна паспортуңуз менен келип берсеңиз болот", - деген Орзубек Назаров.

Спортчунун билдиргени боюнча, кызынын кан тобу биринчи, ага кечээ, 19-августта операция жасалган.

17 жаштагы Аделина Назарова 19-августка караган түнү саат 1:30 чамасында Чүй жана Тоголок Молдо көчөлөрүнүн кесилишинде жол кырсыгына кабылган. Эскерте кетсек, анда Тоголок Молдо көчөсү менен бара жаткан мотоцикл Чүй көчөсүндө бара жаткан Тойота Пассо үлгүсүндөгү жеңил унаа менен сүзүшкөн. Жыйынтыгында мотоциклдин айдоочусу окуя болгон жерден каза таап, ага учкашып келе жаткан кыз оор абалда Бишкектеги травматология жана ортопедия илим изилдөө институтуна жиберилген. Ал эми жеңил унаадагы айдоочу жана жүргүнчү да ар кандай жаракаттарды алышкан. Патрулдук милиция кызматкерлери мотоцикл жогорку ылдамдыкта бара жатканын көрүшүп, аркасынан бара жатканда жол кырсыгы орун алганын көрүшкөнүн Бишкек ШИИБи билдирген.