Бишкек ШИИББи: "Катуу ылдамдыкта бараткан мотоциклди Патрулдук милиция артынан кууган" делген маалымат боюнча текшерүү жүрүүдө"

Бишкекте "Катуу ылдамдыкта бараткан мотоциклди Патрулдук милиция артынан кууган" делген маалымат боюнча текшерүү жүрүүдө. Бул тууралуу бүгүн, 22-августта Бишкек ШИИББинин басма сөз катчысы Адыл Оморов билдирди.

Анын айтымында, жол кырсыгы боюнча Кылмыш-жаза кодексинин 281-беренеси "транспорт каражаттарынын кыймылынын жана аларды пайдалануунун коопсуздук эрежелерин бузуу" менен кылмыш иши козголду.

"Биринчи топтолгон материалдарга караганда, Патрулдук милиция кызматкерлери катуу ылдамдыкта бараткан мотоциклди көрүшүп, кайсы тарапка кеткенин билүү үчүн артынан барышкан. Азыркы тапта ал боюнча маалыматтар текшерилүүдө. Негизи жол эрежесин бузган машинаны артынан кууганга болбойт. Муну бардык эле кызматкерлер билишет. Артынан кууганга кээ бир учурларда гана уруксат. Мисалы, унаада коомго коркунуч жараткан кылмышкер баратканы анык болсо. Мотоциклдин айдоочусу жол эрежесин бузган. Аны көргөн Патрулдук милиция башка кызматкерлерге билдирүү бериш керек. Эгер чындап эле мотоциклди Патрулдук милициянын кууп баратканы аныкталса, аларга тиешелүү чара көрүлөт", - деди Адыл Оморов.

Айта кетсек, жол кырсыгы 19-августка караган түнү саат 01:30 чамасында Чүй жана Тоголок Молдо көчөлөрүнүн кесилишинде болгон. Анда Тоголок Молдо көчөсү менен бара жаткан мотоцикл Чүй көчөсүндө бара жаткан Тойота Пассо үлгүсүндөгү жеңил унаа менен сүзүшкөн. Жыйынтыгында мотоциклдин айдоочусу окуя болгон жерден каза таап, ага учкашып келе жаткан 17 жаштагы Аделина Назарова (Орзубек Назаровдун кызы) оор абалда Бишкектеги травматология жана ортопедия илим изилдөө институтуна жеткирилген. Ал эми жеңил унаадагы айдоочу жана жүргүнчү да ар кандай жаракаттарды алышкан. Окуянын күбөлөрү катуу ылдамдыктагы мотоциклди Патрулдук милиция кууп келе жатканын айтышкан.