Базар-Коргондук тургун алгач аялын өлтүрүп, кийин өзү да асынып каза болду

Жалал-Абад облусуна караштуу Базар-Коргон районунун жашоочусу аялын бычактап өлтүрүп, өзү асынып каза болду. Бул туурасында бүгүн, 26-августта Ички иштер министрлигинин басма сөз кызматы кабарлады.

"25-августта саат 07:00 чамасында Базар-Коргон РИИБине Бешик-Жон айылында 1978-жылы туулган М.А. аттуу эркек адам өзүнүн сарайында асынып алгандыгы тууралуу кабар түшөт. Милициянын ыкчам-тергөө тобу айтылган дарек боюнча барып, үйдүн бөлмөсүнөн Т.Ж. аттуу 30 жаштагы анын аялынын да жансыз денесин табышат. Жубайлар 10 жылдан бери чогуу жашап келишкен. Окуядан бир күн мурун түн ичинде экөө чатакташып, күйөөсү ашкана бычагы менен аялын көкүрөк тушка сайып өлтүрүп, андан соң сарайына барып асынып алган. Кылмыш иши боюнча соттук-медициналык экспертизалар дайындалып, тергөө иштери башталды", - деп айтылат маалыматта.

Ошондой эле жубайлар жаңы салынган үйүнө быйыл гана көчүп келишкендиги, 2 баласы каргашалуу окуя болгон түнү туугандарыныкына кеткендиги, каза болгон келин жакынкы күндөрү Орусияга кетүү үчүн учакка билет алып койгондугу кошумчаланат.