Аида Салянова: "Эненин наристеси ооруп жатканына көңүл бурбаган сот эч бир мыйзамды карабайт"

Бүгүн, 30-августта Бишкек шаарынын Ленин райондук сотунда Жогорку Кеңештин "Ата Мекен" фракциясынан депутат Аида Салянованын үстүнөн козголгон иш боюнча отурум өтүүдө.

Түшкү тыныгууга берилген убакта депутат журналисттерге бул иште саясий боёк бар экенин айтып, Өмүрбек Текебаевдин сотундай ылдам бүткөрүү аракети болуусу мүмкүндүгүн айтты.

"Менин ишим каралып жаткан соттук отурумдун тез өтүп жатканы сот саясий буйрукту аткарып жатканын далилдейт. Сотко чектелген мөөнөт коюп коюшкан, ал аны аткарууда. Эми менин ишим да Текебаевдин сотундай түнгө чейин созулса таң калуунун кереги жок. Бирок ошентсе да калыс карала турган маселелер бар да, кызым ооруп жатса үй-бүлөнүн башка мүчөсү жөнүндө болуп жатат деп сотко мажбурлап алып келүү чечимин чыгарды. "Наристеси ооруп жатыптыр, эне экен" деп көңүл бурбаган сот эч бир мыйзамды карабайт. Адамдык сапат дегенди унутуп, болгону саясий буйрукту аткаруунун аракетинде болуп жатат", - дейт Салянова.

Андан сырткары ал учурда кызынын абалы жакшы экендигин үйүндө дарыгердин көзөмөлүндө дарыланып жатканын баса белгиледи.