Индияда сот Таж-Махалга индуизм динин тутунган адамдардын сыйынуусуна тыюу салды

Индия өлкөсүнүн соту Таж-Махалга индуизм динин тутунган адамдардын сыйынуусуна тыюу салды. Бул тууралуу 31-августта чет элдик басылмалар жазып чыгышты.

Маалыматка ылайык, буга чейин 6 жактоочу бийликке кайрылуу жасап Таж-Махал мусулмандардын эмес, индуизм динин тутунган адамдардын сыйынуучу жайы экенин айтып чыгышкан. Алар Таж-Махал индуизм дининин Шива Кудайына арналып курулганын айтышып, аларга да сыйынууга уруксат берүүлөрүн талап кылышкан.

Мындан соң бийлик өкүлдөрү мамлекеттик архитектура түзүмүнүн кызматкерлерине Таж-Махал качан жана кайсы диндин өкүлдөрү тарабынан курулгандыгын аныктоо тапшырмасын беришкен. Бирок архитекторлор сотто мусулмандардын таламын жактап Таж-Махал Моголдордун падышасы Шах-Жахан тарабынан төрөт учурунда каза болгон аялы Мумтаз-Махалдын элесине арналып курулгандыгын айтышкан.

Сот аталган доону карап, мамлекеттик архитекторлордун пикири менен Таж-Махалга индуизм динин тутунган адамдардын сыйынуусуна тыюу салган. Таж-Махалда мусулмандар гана сыйынып келишкен.