Орзубек Назаровдун кызы кырсыкка кабылган мотоциклди артынан кууган Патрулдук милиция кызматкерлери жумуштан айдалды

Бокс боюнча Дүйнө чемпиону Орзубек Назаровдун кызы Аделина Назарова кырсыкка кабылган мотоциклдин артынан кууп барган Патрулдук милициянын эки кызматкери жумуштан айдалды. Бул тууралуу Бишкек ШИИБинин маалымат кызматы SUPER.KG`ге билдирди.

"Учурда Патрулдук милициянын эки кызматкери жумуштан четтетилди. Кызматтык иликтөө жүргүзүлүп, топтолгон материалдардын баары прокуратурага өткөрүлдү. Эми прокуратура материалдарды иликтеп укуктук баа бериши керек", - деп айтылат билдирүүдө.

Эскерте кетсек,17 жаштагы Аделина Назарова 19-августка караган түнү саат 1:30 чамасында Чүй жана Тоголок Молдо көчөлөрүнүн кесилишинде жол кырсыгына кабылган. Анда Тоголок Молдо көчөсү менен бара жаткан мотоцикл Чүй көчөсүндө бара жаткан Тойота Пассо үлгүсүндөгү жеңил унаа менен сүзүшкөн. Жыйынтыгында мотоциклдин айдоочусу окуя болгон жерден каза таап, ага учкашып келе жаткан кыз оор абалда Бишкектеги травматология жана ортопедия илим изилдөө институтуна жиберилген. Ал эми жеңил унаадагы айдоочу жана жүргүнчү да ар кандай жаракаттарды алышкан. Башында Патрулдук милиция кызматкерлери мотоцикл жогорку ылдамдыкта бара жатканын көрүшүп, аркасынан бара жатканда жол кырсыгы орун алганын көрүшкөнүн Бишкек ШИИБи билдирген болчу.