8 миллион сом салыгын төлөбөй жүргөн ишкерге кылмыш иши козголду

Экономикалык кылмыштуулукка каршы күрөшүү мамлекеттик кызматы 8 миллион сом өлчөмүндөгү салыкты төлөбөгөн жаранды аныктады. Бул тууралуу аталган мекеменин маалымат кызматы бүгүн, 16-сентябрда билдирди.

Маалыматка ылайык, кызматтын Талас облусундагы Кара-Буура жана Манас райондор аралык бөлүмү жалган ишкерлик жана салык төлөөдөн баш тартуу фактылары боюнча Т.А. аттуу жарандын жеке ишкерчилигине байланыштуу тийиштүү иликтөөлөрдү жүргүзгөн.

Анын жүрүшүндө белгилүү болгондой, Т.А. Бишкек шаардык салык башкармалыгынын Октябрь райондук бөлүмүнө салык төлөөчү катары катталган. Андан кийин ал Казакстандан Кыргыз өлкөсүнө товар ташыгандардын жүгүнүн коштомо кагазын өзүнүн атына каттатып, товарды өткөрүп турган. Бул үчүн ага ар бир жүк ташуучу унаанын айдоочусу акчалай акы төлөп жүргөндүгү ачыкталган.

Мунун жыйынтыгында, анын төлөнбөгөн салыгы 8 миллион 760,5 сомго жеткен. Бул факты боюнча кылмыш иши козголуп, тергөө иштери жүрүп жатат.