АКШда 2011-жылдан бери кыздарды алдап, алар менен жыныстык катнашка барып жүргөн фотограф 10 жылга эркинен ажыратылды

АКШдагы Миссури штатынын соту кыздарды алдап, алар менен жыныстык катнашка барып жүргөн 34 жаштагы Марио Амброуз Антуан аттуу фотографты 10 жылга эркинен ажыратты. Маалым болгондой, ал 2011-2016-жылдары социалдык тармакка Никки аттуу айымдын аты менен катталып, акчага муктаж болгон кыз-келиндерге өзүн порно-тасмаларды тарткан режиссёр катары тааныштырып, аларды кастингге катышууга үндөп, эгер өтсө 1,5 миллион доллардан ашуун каражат табууга мүмкүн экендигин айтып торго түшүрүп келген.

Ага алданган кыз-келиндер фотограф менен жолугушууга барышчу. Тагыраагы, Марио аларды үйүнө чакырып, келген кыздарга өзүн Крис деген фотограф катары тааныштырып, шарт боюнча кастингден өтүү үчүн аны менен түрдүү жыныстык катнашка баруусу керектигин айтчу. Алардын шектенбөөсү үчүн алгач кагаз түрүндө келишим түзүлгөн. Чынында ал келишимдер эч кандай юридикалык күчкө ээ эмес болгон.

Укук коргоо органдарынын маалыматында, Марио ушул кезге чейин болжол менен 24төн ашуун кыз-келиндерди алдап келген. Торго түшкөн кыздар айлык-акысын сураганда, мурунку жыныстык катнаштагы видеолорун көрсөтүп, эгер анын айтканына көнүшпөсө ал видеолорду интернетке таратып жиберерин айтып, коркутуп турган.