Мьянма бийлиги: "Мьянма мусулмандарга жасалган мамилесине карата айтылган сындардан коркпойт"

Мьянманын мамлекеттик кеңешчиси Аун Сан Су Чжи дүйнө коомчулугунун рохинджа мусулмандарына болгон саясатты сынга алганынан өлкө бийлиги коркпой турганын айтып чыкты. Муну менен Мьянманын лидери Ракхайн штатында болуп жатканы кырдаал тууралуу биринчи ирет пикирин билдирди. Бул тууралуу чет элдик басылмалар жазышууда.

Мьянма парламентинде сүйлөп жатып Аун Сан Су Чжи: "Дүйнө жүзүндөгү биздин көптөгөн жолдошторубуз өрттөлгөн кыштактар жана качкындар тобу тууралуу маалыматтарга кооптонуп жатканын түшүнүп турам", - деди. Анын айтымында, бийлик кырдаалды жөнгө салуу максатында келип түшкөн бардык аргументтерди карап чыгышы керек. Ошондой эле Мьянма бийлиги тарабынан каатчылыкты жоюу үчүн көрүлүп жаткан чаралар тууралуу дүйнө коомчулугу билиши керектигин кошумчалаган.

Кырдаал кантип курчуду?

Саясий кризиске алып келген Ракхайн штатындагы окуялар август айынын соңунда полиция бөлүмүнө болгон чабуулдан кийин башталган. Анда 12 укук коргоо органынын кызматкерлери каза болгон. Бийлик буга "Рохинджаны куткаруу армиясы" куралдуу тобун күнөөлөгөн.

Рохинджа мусулмандары алардын укуктары чектелип, аларга жарандык берилбей жатканын айтышкан. Мьянма бийлиги алардын көпчүлүгү Бангладештен келген иммигранттар деп айтууда.