Жаштар аллеясындагы көз айнек кайрадан сынды

Бишкек шаарындагы жаштар аллеясындагы чоң көлөмдөгү көз айнек кайрадан сынды. Буга чейин 19-сентябрда ал белгисиз адамдар тарабынан сынгандыгы кабарланган.

Эртеси, көз айнек "Тазалык" ишканасы тарабынан оңдолгон. Кайрадан бүгүн, 22-сентябрда эртең менен шаардыктар көз айнектин сынык жатканына күбө болушту. Бишкек шаардык мэриясынын маалымат кызматынан кабарлангандай, учурда "Тазалык" ишканасынын кызматкерлери кайрадан аны оңдоп жатышат.

Ленин райондук администрациясы жана укук коргоо органдары тарабынан көз айнекти буга чейин сындырып кеткендер изделип жаткан. Интернеттеги социалдык тармактардын колдонуучулары белгисиз бейбаштардын мындай жоругун вандализм деп сыпатташкан. Айрым социалдык тармактагы топтор аларды өз алдыбызча издейбиз деп белсенишип, бирок аны сындыргандар табыла элек болчу.

Жогоруда аталган инсталляция "Көз караш" долбоорунун алкагында былтыр, 2016-жылы июль айында орнотулган. Идеяны алып чыккандар шаарга көрк кошуп, инфраструктуралык курулуштарга байытуу, мындан сырткары көз айнек аркылуу тургундарды өз укугун билүүгө үндөө максатын көздөшкөн. Анын жаратуучулары - борбор калаадагы "DOXA" арт тобунун мүчөлөрү.

Белгилей кетсек, бийиктиги 2,5, туурасы 5, узуну 6 метр келген көз айнек борбор калаада жасалган. Көз айнектин жанына, жерге "Өз укуктарыңды коргоо үчүн аны билишиң керек" деген сөз жазылган.