Баласын өлтүрүп, таштандыга ыргыткан келиндин асынып алышы боюнча шалаакылык беренеси менен кылмыш иши козголду

Бишкек шаардык прокуратурасы Бишкек ШИИББинин убактылуу кармоочу жайында камакта отурган келиндин асынып калышы боюнча фактынын үстүнөн Кылмыш жана Жаза кодексинин "шалаакылык" беренеси боюнча кылмыш ишин козгоду. Мындай маалыматты бүгүн Башкы прокуратуранын маалымат кызматы таратты.

"23-сентябрда Бишкек ШИИББинин убактылуу кармоочу жайында милиция кызматкерлери тарабынан тыкыр көзөмөл жок болгондуктан баласын өлтүрүп таштандыга таштоого шектелген аялдын өз жоолугуна муунуп каза болуп калышы боюнча иш козголду. Аталган иш боюнча учурда тергөө-иликтөө иштери жүрүүдө", - деп жазылат маалыматта.

Эскерте кетсек, ушул жылдын 14-сентябрь күнү Бишкектеги Кустанай жана Астрахань көчөлөрүнүн кесилишиндеги таштанды таштоочу челектен ымыркайдын жансыз денеси табылган. Бишкек ШИИББинин маалыматы боюнча, шектүү катары кармалган 30 жаштагы аялга карата Кылмыш-жаза кодексинин 100-беренеси "эненин жаңы төрөлгөн баласын өлтүрүшү" боюнча кылмыш иши козголуп, шаардык милициянын убактылуу кармоочу жайына киргизилген.

23-сентябрда аталган кылмышка шектелип жаткан келин убактылуу кармоочу жайда өз жоолугуна асынып каза болгондугу тууралуу маалымат тараган.