Сары-Челекте изделип жаткан израилдик кыздын жансыз денеси табылды

Сары-Челек коругунда жоголгон израилдик турист Хилла Ливненин жансыз денеси табылды. Бул тууралуу Сары-Челек коругунун директору Эсенаалы Ормоналиев SUPER.KG`ге билдирди.

"Кечээ орусиялык кино тарта турган чыгармачыл топ Сары-Челек коругуна тасма тартуу үчүн келишкен. Алар бизге уруксат сурап кайрылган кезде биз издөө иштерине алар пайдаланган дрон менен жардам көрсөтүшүн сурандык. Себеби алардын дрону абдан күчтүү экен. Алар макул болуп бүгүн түшкө маал кыздын жансыз денесин дрондун жардамында табышты", - деди Ормоналиев.

Алдын ала маалыматтар боюнча кыз аскадан кулап каза болгондугу айтылууда. Ал алты күндөн бери дайынсыз болуп, аны издөө иштерине 77 адам тартылган болчу.

Өзгөчө кырдаалдар министрлигинин басма сөз кызматы да бул маалыматты тастыктап, куткаруучулар кыздын жансыз денесин алып чыкканы кырсык болгон жерге кеткенин билдирди.

Эскерте кетсек, 23-сентябрда Сары-Челек коругунда Израиль мамлекетинин жараны дайынсыз жоголгон.