Казакстанда медициналык жардам көрсөтүүчү учак кыйрап, 5 адам каза болду. Арасында Кыргыз жараны да бар

Казакстанда медициналык жардам көрсөтүүчү учак кыйрап, 5 адам каза болду. Бул тууралуу казакстандык жалпыга маалымдоо каражаттары жазышты.

Маалыматка караганда, кырсык 3-октябрь күнү кечинде Алматыга жакын жерде болгон. Анда Алматы-Шымкент багытында абага көтөрүлгөн АН-28 учагы 12 мүнөттөн соң радардан жоголуп кеткен. Кийин учакты күйүп жаткан абалда жерден табышкан.

"Учактын ичинде 3 экипаж мүчөсү жана 2 дарыгер болгон. Алар оор абалдагы жаңы төрөлгөн балага медициналык жардам көрсөтүү үчүн баратышкан", - деп айтылат маалыматта.

Ошондой эле казакстандык жалпыга маалымдоо каражаттары каза болгондордун арасында Г.Н.Цой аттуу Кыргыз жараны бар экенин жана анын учактын командири болгонун жазышты.