Эс-учун жоготуп 50 күндөн бери Түркиядагы ооруканада жаткан кыргыз кызы Ширин каза болду

23 жаштагы Ширин Бейшембекова аттуу кыргыз кызынын эки бөйрөгү иштебей калып Түркиянын Денизли шаарындагы жеке ооруканада 50 күндөн бери эс-учу жок жаткан. Бүгүн, 5-ноябрда Ширин каза болуп калганын апасы Анара Жамкешова SUPER.KG'ге билдирди.

Буга чейин маркумдун апасы кызынын абалы өтө оор болуп жатканын айтып, Кыргыз өкмөтүнөн жана коомчулуктан жардам сурап кайрылган болчу. Ширин бир жарым жыл мурун аталган шаарга барып башка бирөөнүн 2 жаштагы кызын багып иштеп жүрүп бөйрөктөрү иштебей ооруканага жатып калган.

Апасы: "Кызым эки бөйрөгү иштебей калып, эс-учун жоготкон абалда 46 күндөн бери жеке ооруканада жатат. Дарыгерлер өпкөсүндө да дарт бар деп жасалма жол менен дем алдырышууда. Тамакты мурдунан салынган түтүк менен беришет. Жатканына бир жума болгондон кийин наркоздон ойготушкан, бирок кайра "ичине инфекция кирип кеткен" деп кайра наркоз менен уктатып коюшту.

Бул ооруканада дарылануу аябай кымбат экен. Айрым кыргыз балдар жана кызым баласын карап иштеген үй-бүлө жардам берип жатышат. Бирок алардын да көп жардам берүүгө чамасы калбай калды. Ошондуктан элчиликке кайрылып, мамлекеттер аралык квота менен мамлекеттик ооруканага котортуп берүүнү сурангам. Элчилик Кыргыз мамлекетинин Саламаттыкты сактоо министрлигине кайрылса, 2017-2018-жылдарга каралган квоталар калбай калганы боюнча жооп келиптир. Элчилик менин өзүмдү кайрылып көрүүмдү айтышууда. Ошондуктан мамлекеттен, элден жардам сурайм", - деген эле.