Москвада Кыргыз жарандары кытайлыктарды оюнчук тапанча менен коркутуп тоноп кетишти

Москвада Кыргыз жарандары оюнчук тапанча менен Кытай жарандарын коркутуп тоноп кетишти. Бул тууралуу Орусиянын жалпыга маалымдоо каражаттары жазды. Анда белгилүү болгондой, Орус полициясына арыз жазышпайт деген ойдо шектүүлөр атайын Кытай жана вьетнамдык соодагерлерди тоношкон.

"Учурда аталган кылмыштуу топтун уюштуруучусу Кыргыздан келген 24 жаштагы жаран кармалып, камакка алынды. Анын бул кылмышка чогуу барган жолдоштору изделүүдө", - деп жазылат маалыматта.

Тергөөчүлөрдүн айтымында аталган топ Москванын Марьино районунда 2 тоноо кылмышын жасашкан. Алар тоноочулук кылганга чейин Москвадагы унаа жуучу жайлардын биринде иштеп жүрүп, ээси менен пикирлери келишпей жумуштан айдалышканы белгилүү болду. Мындан улам каражат табуу максатында чыгыш өлкөлөрүнүн соодагерлерин тоноону максат кылышкан.

"Тоноонун мотивдери окшош - алар көп кабаттуу үйлөрдүн лифттерине киргендерди аңдып турушкан. Качан көздөгөн адамдары лифтке киргенде кошо киришип, оюнчук тапанча менен коркутушуп кийимдерин, акча жана зер буюмдарын тартып алып кетишкен", - деп билдирген полиция. Аталган кылмыш иши боюнча тергөө жүрүүдө.