Кылмышка шектүү катары кармалган жаранды ур-тепкиге алган аймактык тескөөчүлөр камакка алынды

Бүгүн, 24-ноябрда Бишкек шаардык соту Башкы прокуратуранын кассациялык арызын канааттандырып, Т.Э., Т.Э. жана М.С. аттуу үч милиционерди УКМКнын СИЗОсуна камакка алуу чечимин чыгарды. Бул тууралуу Башкы прокуратуранын маалымат кызматынан кабарлашты.

Буга чейин маалым болгондой, 7-сентябрда жогоруда саналган аймактык үч инспектор Аламүдүн районундагы "Таш-Дөбө" милиция бөлүмчөсүнө К.Э. аттуу жарандын арызынын негизинде Н.Э. аттуу жаранды кылмышка шектүү катары кармап келишкен. Бирок арыз 8-сентябрда катталган. Соттук-медициналык экспертизанын жыйынтыгында кармалган адам үч милиционер тарабынан сабалганы белгилүү болгон.

Мындан улам милиция кызматкерлерине фактынын негизинде Башкы прокуратура тарабынан кылмыш иши ачылып, тергөөдөн кийин Биринчи Май райондук сотуна камакка алуу өтүнүчү келтирилген. Бирок сот аларды үй камагына чыгарып койгон.

Башкы прокуратура райондук соттун чечимине каршы экенин билдирип шаардык сотко кайрылган болчу.