Чүйдө өмүр бою эркинен ажыратылгандардын абагында жаңы бөлүм ачылды. Анда китеп окуп, күндү көрүүгө мүмкүнчүлүк берилет

Бүгүн, 18-декабрь күнү Сокулук районунун Жаңы-Жер айылындагы өмүр бою эркинен ажыратылгандар үчүн абакта жаңы бөлүм ачылды. Иш-чаранын жүрүшүндө Жазаларды аткаруу мамлекеттик кызматынын төрагасы Таалайбек Жапаров №19-түзөтүү мекемесиндеги жаңы бөлүм эл аралык уюмдардын колдоосу менен салынган.

"№19-түзөтүү мекемесиндеги бул бөлүм эл аралык уюмдар тарабынан каржыланды. Курулуш 6 айга созулуп жаза аткаруучулар үчүн бардык шарттар каралган. Бул бөлүм өмүр бою эркинен ажыратылган, абактын мыйзамдарын так аткарып 20 жылдан ашуун түрмөдө отургандар үчүн салынды. Мунун баары өмүр бою жаза мөөнөтүн өтөп жаткандардын жазасын жеңилдетүү иретинде эмес, аларга мүмкүнчүлүк берүү үчүн адам катары алар да билим алып, жеке жашоосунда бир аз өзгөрүүлөргө, жакшы сапаттарга ээ болуу максатында каралган иш", - деп билдирди Жапаров.

Жалпысынан Кыргыз өлкөсүндө өмүр бою эркинен ажыратылгандардын саны 300 адамды түзөт. Ошолордун ичинде абак мыйзамдарын так аткарган 3-4 адамга жеңил жаза берилиши мүмкүн.